Ýkrainanyń qazirgi prezidenti ári prezidenttikke kandidat Petr Poroshenko saiasi básekelesi, tanymal ártis Vladimir Zelenskiidiń ekeýara pikirsaiysty stadionda ótkizý týraly usynysyna kelisti. 31 naýryzda Ýkraina Prezidenti sailaýynyń alǵashqy kezeńinde eń kóp daýys jinaǵan Zelenskii ózinen keiingi oryndaǵy Poroshenkomen Kievtegi "Olimpiiskii" stadionda kezdesip, pikir talastyrýǵa ázir ekenin málimdegen.
Poroshenko sailaý týraly zańda kandidattar pikirsaiysy ondaǵan million adam kórýi úshin qoǵamdyq telearna stýdiiasynda ótedi dep kórsetilgenin eskertip, áitkenmen debatty stadionda ótkizý týraly Zelenskiidiń usynysyn qabyl alǵan. "Biraq stadion bolsa, meili. Men sizdi kútemin, Vladimir Aleksandrovich" dep málimdedi Poroshenko Twitter áleýmettik jelisindegi paraǵynda jariialaǵan videorolikte.
Buǵan deiin Poroshenko Telegram-kanalynda saýalnama jariialap, "Prezident sailaýy týraly" zańda kandidattar pikirsaiysy sailaýdyń ekinshi kezeńi aldyndaǵy jumada tikelei efirde ótedi dep jazylǵanyn eske saldy. Saýalnama jaýap bergenderdiń kóbi pikirsaiysty zańǵa sai ótkizýdi jaqtaǵan.
Zelenskiige jaýabynda Poroshenko "Prezident jáne Joǵarǵy Bas qolbasshy bolý" degen "oiyn men unaýǵa tyrysý" emes dep málimdedi. Sailaý pikirsaiysy áldebir "shoý emes" jáne ony "stadionda qyzyqtaý úshin" ótkizbeidi dedi Poroshenko. Onyń sózinshe, ózi men básekelesiniń "geosaiasi saǵattarynyń tilderi" múlde "qarama-qarsy baǵytqa" qarap tur. Poroshenko Ýkrainany eshkimge eshqashan tize búkpeitin eýropalyq qýatty memleket retinde kórgisi keletinin aitqan.
Osynyń aldynda Vladimir Zelenskii eger Kievtegi "Olimpiiskii" stadionynda ótkizýge kelisse, onda Poroshenko shtabynyń pikirsaiys ótkizý týraly usynysyn qabyl alýǵa ázir ekenin málimdegen. Buǵa qosa ol pikirsaiysqa barlyq jýrnalister qatystyrylsyn, ony tikelei efirde kórsetýge barlyq telearnalarǵa ruqsat berilsin degen talaptar qoiǵan. Zelenskii ózin Poroshenkonyń "Kremldiń nemese Kolomoiskiidiń qýyrshaǵy", "vatnik" jáne "maloross" dep emes, "Ýkraina prezidenttigine kandidat" dep ataýyn talap etken.
Ýkraina Ortalyq sailaý komissiiasynyń beisenbide jariialaǵan málimeti boiynsha, 31 naýryzda ótken prezident sailaýynyń birinshi kezeńinde sailaýshylardyń 30 paiyzdan astamy Vladimir Zelenskiidi qoldaǵan, al 16 paiyzǵa jýyǵy Petr Poroshenkoǵa daýys bergen.
Prezident sailaýynyń ekinshi kezeńi 21 sáýirge belgilengen.
