AQSh memlekettik hatshysy Maik Pompeo "Venesýela prezidenti Nikolas Madýro 30 sáýirde Kýbaǵa qashpaq boldy" dep málimdedi. Pompeo bul týraly amerikalyq CNN arnasyna 1 mamyrda bergen suhbatynda aitty, dep jazady Azattyq.
Memlekettik hatshynyń sózinshe, ushaǵy ushý alańynda áýege kóterilýge daiyn turǵan Nikolas Madýrony Kreml toqtatqan. Pompeo Madýromen Resei biliginen sóilesken adamnyń atyn aitqan joq. "Ushaq Gavanaǵa qonýy kerek edi" dedi ol.
Pompeo Vashingtonnyń Venesýela oppozitsiiasynyń lideri Hýan Gýaidony qoldaitynyn taǵy bir márte málimdedi.
30 sáýirde Gýaido Madýrony bilikten ketirý úshin el azamattaryn jappai sherýge shyǵýǵa shaqyrǵan. Kóshege shyqqan oppozitsiia jaqtastary men úkimet kúshteriniń tiresi shielenisip, 50-den astam adam túrli jaraqatpen Karakastaǵy aýrýhanaǵa jetkizilgen. Úkimet sarbazdarynyń bir bóligi Gýaido jaǵyna ótken.
Biyl qańtarda ózin Venesýelanyń ýaqytsha prezidentimin dep jariialaǵan Hýan Gýaidony elýden astam el Venesýelanyń zańdy basshysy dep tanyǵan. Nikolas Madýro eldegi daǵdarysqa AQSh-ty aiyptaidy.
Buǵan deiin AQSh prezidentiniń ulttyq qaýipsizdik jónindegi kómekshisi Djon Bolton "Madýronyń jaqtastary ony bilikten ketirý jaily ózara kelissóz júrgizip jatyr" dep habarlaǵan.
Madýrony Resei men Qytai bastaǵan sanaýly el qoldaidy.
