Qazaqstannyń Varshavadaǵy Elshiligi Polshadaǵy qazaqstandyq stýdenttiń qaiǵyly qazasyna qatysty tergeýdi erekshe baqylaýda ustaýda, dep habarlaidy "Ult aqparat".
«Polshanyń quqyq qorǵaý organdarynyń málimetinshe, jergilikti politsiia kisi óltirgen kúdiktini jáne onyń joldasyn - osy eldiń azamattaryn ustady. Birinshisine kisi óltirdi degen aiyp taǵyldy. Al onyń dosy tergeýge kedergi keltirdi jáne kómek kórsetpedi dep aiyptalýda. Kúdiktiniń ańshy ekeni anyqtaldy jáne qazaqstandyq stýdentter turǵan jaqqa oq atqan. Qazirgi ýaqytta tergeý sharalary júrgizilýde», - delingen QR Syrtqy ister ministrligi taratqan resmi aqparatta.
Vedomstvonyń atap ótýinshe, Qazaqstan tarapy Polsha biligine barynsha muqiiat tergeý júrgizýdi jáne barlyq kinálilerdi jazalaý týraly ótinish bildirgen. Qazirgi ýaqytta diplomattar qujattardy rásimdep, marqumnyń denesin otanyna jiberý boiynsha sharalar qabyldap jatyr.
«Qaitys bolǵan stýdenttiń týystary men jaqyndary olardyń sezimderi men jeke ómirine qol suqpaý quqyǵyn qurmetteýdi, osy tragediia tóńireginde dúrliktirmeýdi suraidy», - dedi ministrlikten.
