Polshanyń Máskeýdegi elshiligi Reseidiń birqatar aqparat quraly men saiasatkerin "jalǵan aqparat taratty" dep aiyptady. Elshiliktiń aitýynsha, olar Polsha biligi Italiiaǵa gýmanitarlyq kómek jetkizbek bolǵan reseilik áskeri ushaqtardyń Polsha aýmaǵynan ushyp ótýine kedergi jasady dep jalǵan málimdeme jasaǵan.
"Resei taraby áskeri ushaqtardy ótkizý týraly Polsha jaǵyna ótinish túsirmedi. Sondyqtan Polsha biligi Italiiaǵa reseilik gýmanitarlyq kómektiń jetkizilýine kedergi jasaýǵa tyrysty degen aqparat shyndyqqa sáikes kelmeidi" delingen Polshanyń Máskeýdegi elshiliginiń jibergen habarlamasynda. Polsha elshiligi reseilik BAQ-ty Eýropada koronavirýspen kúres taqyrybyn qamtyǵan kezde derek kózin muqiiat tańdaýǵa shaqyrdy.
Jaqynda Resei Italiiaǵa dárigerlerin jiberip, dezinfektsiia quraldaryn da jetkizgen. Osylaisha daǵdarys kezinde Italiiaǵa kómektesken elderdiń birine ainaldy. Buǵan deiin Italiiaǵa Qytai, Kýba, Germaniia, Frantsiia kómek bergen.
Italiiaǵa reseilik ushaq qonǵannan keiin birqatar Kremldi qoldaityn BAQ, blogtar men Telegram arnalary Polsha ushaqtardy ótkizbei qoidy degen aqparat taratqan. Mysaly "Komsomolskaia pravda" basylymy federatsiia múshesi Aleksei Pýshkovtyń "Polsha Italiiaǵa gýmanitarlyq kómek jetkizbek bolǵan reseilik ushaqtardy áýe keńistiginen ótkizbei qoidy. Bul memlekettik deńgeide jasalǵan satqyndyq" dep jazǵan Twitter-degi postyn jariialady. 24 naýryzda Pýshkov jazbasy joǵalyp ketti.
Buǵan deiin Resei prezidenti Vladimir Pýtin ekinshi dúniejúzilik soǵysqa túrtki bolǵan oqiǵalarǵa baǵa berilýin synap, izinshe eki tarap bir-birine baǵyttalǵan ótkir málimdeme jasaǵan.
