Foto: JI
Qazaqstan politsiiasy sońǵy ýaqytta ásirese egde jastaǵy azamattarǵa baǵyttalǵan alaiaqtyq áreketter kóbeigenin málimdedi dep habarlaidy Ult.kz.
Quqyq qorǵaý organdarynyń málimetinshe, alaiaqtar ózderin bank nemese memlekettik organ qyzmetkerleri retinde tanystyryp, túrli syltaýmen azamattardyń aqshasy men jeke derekterin iemdenýge tyrysady.
Politsiia qazirgi kezde keń taralǵan birneshe alaiaqtyq shemasyn atady. Sonyń biri – azamattarǵa bank shotynan aqsha urlanǵaly jatqanyn aityp, qarajatty «qaýipsiz shotqa» aýdarýǵa kóndirý. Ol úshin qaskóiler siltemeler jiberip nemese arnaiy qosymshalardy ornatýdy suraidy.
Sondai-aq «qaýipsizdik júiesin jańartý» degen jeleýmen belgisiz baǵdarlamalardy júktetý jaǵdailary jiilegen. Mamandar mundai qosymshalar ornatylǵannan keiin alaiaqtardyń bank derekterine tolyq qol jetkizýi múmkin ekenin eskertti.
Budan bólek, keibir alaiaqtar kommýnaldyq qyzmet nemese zeinetaqy uiymdarynyń qyzmetkeri bolyp habarlasyp, tólemderdi qaita esepteý ne eseptegishterdi tekserý syltaýymen SMS-kodtar men jeke málimetterdi suraidy.
Politsiia qaskóilerdiń adamdardyń emotsiiasyna qysym jasaý tásilin de jii qoldanatynyn aitty. Olar týysyńyz qiyn jaǵdaiǵa tap bolǵanyn aityp, shuǵyl aqsha aýdarýdy talap etedi.
Sonymen qatar qazirgi tehnologiialardy paidalanyp, jaqyn adamnyń daýsyn nemese beinesin qoldan jasaý arqyly senimge kirý áreketteri de kezdesip jatyr.
«Bank kartasynyń derekterin, SMS-kodtardy, qupiiasózder men PIN-kodtardy eshkimge aitpańyz. Belgisiz qosymshalardy ornatpańyz jáne kúmándi siltemelerge ótpeńiz», – dep eskertti politsiia.
Quqyq qorǵaý organdary azamattardy kúmándi jaǵdaida resmi nómirler arqyly aqparatty qaita tekserýge jáne jaqyndarymen aqyldasýǵa shaqyrdy.
