Foto: Polisia.kz
Politsiia avtokólik ielerin internet arqyly taratylyp jatqan jańa alaiaqtyq túrinen saq bolýǵa shaqyrdy, dep habarlaidy Ult.kz.
Sońǵy ýaqytta túrli elderde, sonyń ishinde Qazaqstanda da, jol qozǵalysy erejesin buzǵany úshin jalǵan aiyppul týraly habarlamalar jiberilýde.
Almaty qalalyq Politsiia departamenti kiberqylmysqa qarsy kúres basqarmasynyń bastyǵy Ánes Qaldybaevtyń aitýynsha, alaiaqtar júrgizýshilerge elektrondyq poshta nemese messendjerler arqyly habarlama jiberedi. Onda kólik nómiri men júrgizýshiniń jeke derekteri kórsetilip, “aiyppuldy tóleýge arnalǵan” silteme beriledi.
Biraq bul – fishingtik shabýyl. Eger adam sol siltemege kirip, bank kartasynyń málimetterin engizse, qaskóiler onyń esepshotyna qol jetkizedi. Kei jaǵdailarda silteme arqyly virýs júktelip, jeke aqparat urlanady.
Mundai internet-shabýyldar AQSh pen Reseide buryn tirkelgen. Endi olardyń Qazaqstanda taralý qaýpi bar.
Politsiia eske salady:
-
Resmi aiyppul týraly habarlamalar tek 1414 qysqa nómirinen keledi;
-
Olar eshqashan tólem jasaýǵa arnalǵan siltemelerdi qamtymaidy;
-
Aiyppuldardy egov.kz, qamqor.gov.kz saittarynda nemese bankterdiń mobildi qosymshalary arqyly tekserýge bolady.
Eger sizge kúmándi habarlama kelse:
🔹 Siltemelerge ótpeńiz jáne tirkelgen faildardy ashpańyz;
🔹 Aqparatty tek resmi derekkózderden tekserińiz;
🔹 Eger karta derekterin engizip qoiǵan bolsańyz – dereý kartańyzdy buǵattap, bankke jáne politsiiaǵa 102 nómiri arqyly habarlasyńyz.
