Qyzylorda oblysynda politsiiadan qashpaq bolǵan esirtki ósirýshiler tikushaqpen ustaldy, dep habarlaidy "Ult aqparat" Polisia.kz saityna silteme jasap.
Esirtki qylmysyna qarsy is-qimyl departamentiniń mobildi toby jáne IIM-niń arnaiy bólinisteri Qaraǵandy jáne Qyzylorda oblystarynyń shekaralaryn tikushaqpen barlaý kezinde Qyzylorda qalasynan 320 km qashyqtyqta qoldan ósirilgen qarasora plantatsiiasyn anyqtaǵan. Sol jerde sýarýǵa arnalǵan bassein, agroquraldardy saqtaýǵa jáne sol jerde turýǵa arnalǵan jer úi bolǵan.
«Plantatsiiaǵa jaqyn ushyp barý kezinde jalǵan memlekettik tirkeý nómirleri taǵylǵan eki «Toyota Land Cruiser» jol talǵamaityn kólikteri baiqaldy. Olar tikushaqtan úlken jyldamdyqpen qasha bastady. Daýys zoraitqysh arqyly politsiia qyzmetkerleriniń toqtaý týraly talabyn elemedi. Avtokóliktiń sońyna túsken qyzmetkerler ony toqtatý úshin kóliktiń aldyna jáne birneshe ret dóńgelekterine oq atty. Dóńgelekterine zaqym kelgen soń ǵana eki kólik qozǵalysyn toqtatty. Politsiia qyzmetkerleri jergilikti úsh turǵyndy ustady. Olardy ustaý kezinde bireýi jaraqat aldy. Oǵan alǵashqy meditsinalyq kómek kórsetildi jáne meditsinalyq mekemege jetkizildi. Onyń ómirine qazirgi ýaqytta esh qaýip tónip turǵan joq. Atalǵan jerde Qyzylorda oblysynyń Politsiia departamentiniń jedel-tergeý toby jumys istep jatyr», - dedi politsiiadan.
Eske salaiyq, respýblika aýmaǵynda 1 maýsymnan bastap 30 qazanǵa deiin «Qarasora» arnaiy operatsiiasy ótkizilip jatyr. Onyń sheńberinde quramynda esirtki bar ósimdikterdiń zańsyz ósirilgen alqaptaryn anyqtaý úshin tikushaqty paidalaný, joǵary jyldamdyqtaǵy avtokólikteri bar mobildi toptardy jumyldyrý kózdelgen. Operatsiia bastalǵaly barlyǵy 430 esirtki qylmysy anyqtaldy, onyń ishinde 178-i – quramynda esirtki bar ósimdikterdi zańsyz ósirýge, 153-i – satýǵa, 83-i – saqtaýǵa qatysty. Sondai-aq esirtki kontrabandasynyń 5 faktisi anyqtaldy. Zańsyz ainalymnan jalpy 9 tonna esirtki alyndy.
