Kólik politseileri mas kúide júrgen Ázerbaijan men Ózbekstan azamattaryn poiyzdan túsirip aldy, dep habarlaidy "Ult aqparat" Kóliktegi politsiia departamentiniń baspasóz qyzmetine silteme jasap.
Baspasóz qyzmetiniń málimetine qaraǵanda, Aqtóbe stantsiiasyndaǵy Jelilik politsiia bóliminiń qyzmetkerleri «Oral-Almaty» baǵytyndaǵy jolaýshylar poiyzynan qoǵamdyq tártipti buzǵan 42 jáne 36 jastaǵy eki er adamdy túsirip alǵan. Tekserý kezinde kólik politseileri quqyq buzýshylardyń Ázerbaijan men Ózbekstan respýblikalarynyń azamattary ekenin anyqtaǵan.
«Er azamattar túngi ýaqytta mas kúide dóreki minez kórsetip, qoǵamdyq oryndarda adamnyń qadir-qasietin qorlaityn sózder aitqan. Osylaisha azamattardyń tynyshtyǵyna kedergi keltirdi», - deidi Kóliktegi politsiia departamenti bastyǵynyń birinshi orynbasary Qalijan Qoblandin.
«Ustalǵandarǵa qatysty QR ÁQBtK-niń 434, 437, 440, 441-baptary boiynsha tórt ákimshilik hattama toltyryldy», - dep túiindedi sózin Q.Qoblandin.
«Aqtóbe qalasynyń Mamandandyrylǵan ákimshilik sotynyń qaýlysymen shetel azamattary kináli dep tanylyp, 3 jáne 2 táýlik merzimge ákimshilik qamaýǵa alyndy», - dedi politsiia polkovnigi.
