Elordalyq politseiler kóktaiǵaqqa bailanysty júrgizýshiler men jaiaý júrginshilerdi jolda abai bolýǵa shaqyrdy, dep habarlaidy "Ult aqparat".
Qalalyq politsiia departament taratqan málimetke sáikes, 20 jeltoqsan kúni elordada 80-ge tarta jol-kólik oqiǵasy tirkelip, bir adam dene jaraqatyn alǵan. Emhanaǵa qaralǵannan keiin ol úiine qaitaryldy.
«Joldyń retteletin jáne rettelmeitin bóligin basyp óter kezde jaiaý júrginshilerdi saq bolýǵa shaqyramyz. Júrgizýshiler de jol qiylystary men jaiaý júrginshilerge ótetin joldy basyp óterde saq bolsa deimiz. Jyldamdyq rejimin qatań saqtaý kerek. Ásirese júrgizýshilerdi halyqaralyq saparlardy keiinge shegerip, aýa raiy men joldyń jai-kúii týraly habarlamalardy baqylap otyrý kerektigin eskertemiz», - delingen departamenttiń habarlamasynda.
Politsiia sonymen qatar qardyń qanshalyqty qalyń jaýatynyn, kóktaiǵaqtyń jai-kúiinen málimet beretin habarlamalardy nazar tys qaldyrmaý kerektigin eskertedi. Qazirgi ýaqytta qala kóshelerindegi qardy kúreý úshin mamandandyrylǵan tehnikalar barynsha molynan jumyldyrylǵan.
«Elorda turǵyndaryn osy eskertýge túsinistikpen qaraýdy ótinemiz. Patrýldik politsiia qyzmetkerleriniń talaptaryn oryndaý kerek. Jolda kele jatqan qar kúreitin tehnikalardyń jumysyna kedergi keltirmeýdi suraimyz», - delingen habarlamada.
