Almatylyq politseiler jańa týǵan náresteni qutqaryp qaldy, - dep habarlaidy Polisia.kz.
Oqiǵa keshe túnde Túrksib aýdanynda bolǵan.
"Bizge túngi saǵat ekide kámeletke tolmaǵan qyz túsik tastaǵany týraly qońyraý kelip tústi. Ol qaladaǵy aýrýhanalardyń birine jatqyzyldy. Dárigerlermen sóileskennen keiin men oqiǵa ornyna baryp, tekserýdi jón kórdim. Basyma "bala qaida" degen suraq keldi. Qyzdyń anasynan oqiǵaǵa deiin qyz syrttaǵy dárethanada biraz ýaqyt bolǵanyn bildim. Dárethana ishinen qan izderin taýyp, ishinde jatqan balany kórdim. Ol dem alyp jatty. Osy kezde tergeý-jedel toby keldi, onyń quramynda kriminaldyq politsiia bóliminiń jedel ýákili Ǵaziz Hamasqaliev boldy. Biz dárethananyń edeninen taqtailardy tez alyp tastadyq. Áriptesim Ǵaziz tómen túsip, balany qyzmettik kóilegine orap, abailap shyǵaryp aldy. Sol kezde náreste jylady. Bárimiz mazasyz kúide edik, ýaiymdadyq. Balany tez arada dárigerlerge tapsyrdyq", – dedi Túrksib aýdandyq PB-nyń kámeletke tolmaǵandar isi jónindegi ýchaskelik inspektory Nurjan Shatýnov.
17 jastaǵy jasóspirimniń anasynyń aitýynsha, ol qyzynyń júkti bolǵanyn bilmegen. Qazirgi ýaqytta bul derek boiynsha Túrksib aýdandyq PB-na qarasty politsiia bóliminde tergeý amaldary bastalǵan. Oqiǵanyń mán-jaiy anyqtalyp jatyr.
"Qazir balanyń jaǵdaiyn bilip qaittyq. Ol dárigerlerdiń baqylaýynda jansaqtaý bóliminde jatyr. Óz betinshe dem alyp jatyr – bul jańalyqqa balany qutqarýǵa qatysqan barlyq áriptesim qatty qýandy. Demek, bala ómir súredi. Ol týylǵannan beri óz ómiri úshin kúresti. Oǵan zor densaýlyq, uzaq ǵumyr tileimiz. Baqytty bolyp óse bersin. Men - úsh uldyń ákesimin. Sondyqtan bul oqiǵa meni beijai qaldyrmady. Biz óz áriptesterimizben birge qutqarylǵan náresteniń taǵdyryn mindetti túrde qadaǵalaimyz jáne múmkindiginshe oǵan qatysatyn bolamyz", – dedi Shatýnov.
