Foto: Iandeks
Eńbek jáne halyqty áleýmettik qorǵaý ministrligi Memlekettik kirister komitetimen birlesip, internet-platformany paidalana otyryp qyzmet kórsetetin tulǵalardy salyqtyq ákimshilendirýdiń ózgeshe tártibin qoldaný jónindegi pilottyq jobany iske asyrýǵa kiristi, dep habarlady vedomstvonyń baspasóz qyzmeti.
Joba internet-platformalar arqyly jumyspen qamtylǵandardy áleýmettik qamsyzdandyrý júiesine tartýdy kózdeidi. Osyndai internet-platformalardyń biri – "Iandeks.Taksimen" tiisti kelisimge qol qoiylǵan.
"Iandeks" internet-platformasynda tirkelgen taksi júrgizýshileri pilottyq jobaǵa erikti túrde qatysa alady. Ol úshin azamattarǵa "e-salyq Business" mobildi qosymshasyn paidalanyp, arnaiy salyq rejimin qoldana otyryp, jeke kásipker retinde tirkelý qajet.
"Pilottyq joba sheńberinde jeke tabys salyǵyn, áleýmettik aýdarymdardy, mindetti zeinetaqy jarnalaryn jáne taksi júrgizýshileriniń tabysynan meditsinalyq saqtandyrý jarnalaryn tóleý jónindegi mindettemeler internet-platforma operatoryna ("Iandeks.Taksi") júkteledi", - delingen habarlamada.
Internet-platforma operatorynan alynatyn oryndaýshylardyń tabystary týraly málimetter negizinde salyq pen áleýmettik tólemder somalaryn esepteýdi memlekettik kirister organdary júzege asyrady ári operatorǵa taksi júrgizýshileriniń tabystary boiynsha eseptelgen salyq jáne áleýmettik tólemder somalary týraly málimetterdi beredi.
Internet-platforma operatory salyq pen áleýmettik tólemderdi ustap qalýdy jáne tóleýdi keiinnen tiisti qorlar arasynda bólý ári aýdarý úshin "Azamattarǵa arnalǵan úkimet"memlekettik korporatsiiasynyń bank shotyna árbir áleýmettik tólemge jeke tólem tapsyrmalary arqyly júrgizedi.
Joǵaryda atalǵan tetikterdi iske asyrý maqsatynda qazirgi ýaqytta "Iandeks.Taksi" jáne Qarjy ministrligi Memlekettik kirister komitetiniń aqparattyq júielerin tehnikalyq integratsiialaý boiynsha jumys júrgizilip jatyr.
Sonymen qatar Digital ID arqyly biometriialyq sáikestendirýden ótý jolymen "Iandeks.Taksi" mobildi qosymshasynda tirkelý rásimin jeńildetý josparlanýda.
2023 jyldyń 1 shildesinen bastap pilottyq joba tolyq iske qosylady dep josparlanyp otyr.
