2021 jyldyń aqpanyna deiin turǵyn úilerge qyzmet kórsetetin múlik ieleri birlestigi (MIB) uiymdary qurylady. Bul týraly «Turǵyn úi-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ ádisteme jáne aimaqtyq damý departamenti basshysynyń orynbasary Marǵulan Ábdikárimov aitty, dep habarlaidy QazAqparat.
«Múlik ieleriniń birlestigi uiymdary ár turǵyn úi kesheninde qurylatyn bolady. Bul burynǵy páter ieleri kooperativiniń qyzmetin atqarady. Degenmen, aiyrmashylyǵy kóp. Máselen, bir PIK ondaǵan, tipti júzdegen turǵyn úige servistik qyzmet kórsetedi. Oǵan páter ieleri ai saiyn qajetti qarajat aýdarady. Osy jerdegi kemshilik – azamattar aýdarǵan aqsha bir qorjynǵa túsip otyrdy. Ony PIK qaida jumsaitynyn, ne satyp alatynyn eshkim baqylai almaidy. Sondyqtan podezderge jóndeý jasaý, liftilerdi baqylaý jáne basqa da servistik qyzmetterdi ýaqytynan kesh jasap júr. Al múlik ieleriniń birlestigi uiymy bir turǵyn úidiń sheńberinde qurylady, sáikesinshe bir esepshot ashylady jáne tek sol baspanany tolyq qamtamasyz etýge múddeli», - dedi Marǵulan Jeńisuly.
Onyń aitýynsha, múlik ieleri birlestigi uiymynyń tóraǵasy jinalys ótkizip, turǵyndar arasynan 3 adamnan turatyn «Úi keńesin» sailaidy. Olar qajetti jumystardyń josparyn jasaýy tiis.
«MIB-ti qurý týraly jinalys ótkizgen ýaqytta oǵan kem degende turǵyndardyń 50% qatysýy kerek. Qazirgi karantin talaptaryna sáikes, kóp adam jinalýǵa bolmaidy. Sondyqtan olar páter ielerine arnaiy saýalnama qaǵazdaryn taratyp, pikirin bilýi tiis. Keiin azamattar aqyldasa otyryp, 3 jylǵa «Úi keńesin» bekitip, tiisti qujattardy Halyqqa qyzmet kórsetý ortalyǵyna tapsyrýy qajet. Osy jumystar aiaqtalǵan soń, múlik ieleriniń birlestigi uiymy qyzmetin bastai alady. Bul mehanizm qarajattyń ashyqtyǵyn da qamtamasyz ete alady. Ár ai saiyn atqarylǵan qyzmetter men jumsalǵan qarajat týraly MIB turǵyndarǵa esep berip otyrýy qajet», - dep atap ótti «Turǵyn úi-kommýnaldyq sharýashylyǵyn jańǵyrtý men damytýdyń kazaqstandyq ortalyǵy» AQ ádisteme jáne aimaqtyq damý departamenti basshysynyń orynbasary Marǵulan Ábdikárimov.
Sondai-aq, Marǵulan Jeńisulynyń málimetinshe, páter ieleri kooperativi atalǵan uiym qurylǵan sátte birden jabylmaidy. PIK 2022 jyldyń 1 shildesine deiin qyzmetin jalǵastyrady.
Aita keteiik, múlik ieleriniń birlestigi siiaqty mehanizm Germaniia, Polsha elderinde qarqyndy damyǵan. Otandyq júieni jasaýda atalǵan memleketterdiń tájiribeleri negizge alynǵan.
