Pfizer vaktsinasymen aqyly ekpe jasaý múmkin emes. Bul týraly QR Densaýlyq saqtaý vitse-ministri Jandos Búrkitbaev aitty, dep habarlaidy QazAqparat.
«Búginde vaktsinanyń birinshi komponentin 10 mln-nan astam adam aldy. Spýtnik V vaktsinasy 6,3 mln, QazVac vaktsinasy shamamen 800 myń, «Sinofarm» vaktsinasy 1,8 mln, «Sinovak» vaktsinasy 250 myń, Pfizer vaktsinasy 770 myń adamǵa salyndy. Bul vaktsinalardyń ishinde tórteýi Dúniejúzilik densaýlyq saqtaý uiymynyń sertifikatyna ie», - dedi vitse-ministr Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, qazirgi ýaqytta halyqtyń revaktsinatsiia kezinde tańdaý jasaý múmkindigi bar.
«Ókinishke orai Pfizer kompaniiasy aqyly vaktsinatsiia jasaýǵa kelisim bermei otyr. Kompaniia bul túptep kelgende janama qaita satylymǵa alyp keledi dep sanaidy. Densaýlyq saqtaý ministrligi men kompaniia arasyndaǵy kelisimshartqa sáikes, janama qaita satylymǵa ruqsat berilmeidi. Osyǵan orai, Pfizer vaktsinasymen aqyly túrde ekpe jasaý múmkin emes degen sheshimge keldik. Degenmen, keshe vedomstvoaralyq komissiia múmkindigi shekteýli jáne 50 jastan asqan adamdardy revaktsinatsiialaý týraly sheshim qabyldady», - dedi Jandos Búrkitbaev.
