QR DSM sanitarlyq-epidemiologiialyq baqylaý komitetiniń tóraǵasy Aijan Esmaǵambetova Pfizer vaktsinasy nelikten aqyly túrde salynbaitynyn túsindirdi, dep habarlaidy QazAqparat.
«QR Densaýlyq saqtaý ministrligi uzaq ýaqyt boiy Pfizer vaktsinasyn jetkizýshi kompaniiamen preparatty aqyly negizde jetkizý máselesin pysyqtap keldi. Ókinishke qarai, kompaniia immýndaýǵa arnalǵan vaktsinany aqyly negizde jetkizýden bas tartty dep aitýǵa bolady, óitkeni qazir bul preparatqa jahandyq kólemde suranys bar. Ózderiń kórip otyrǵandai, barlyq elderde vaktsinalaýdan bólek, revaktsinalaý jumystary, tipti onyń ekinshi komponentin egý bastaldy», - dedi Esmaǵambetova Ortalyq kommýnikatsiialar qyzmetinde ótken baspasóz máslihatynda.
Tiisinshe, vaktsinaǵa degen suranys árdaiym artyp keledi jáne kompaniia qazir birinshi kezekte úkimetpen jumys isteidi – iaǵni Pfizer kommertsiialyq satý úshin preparat jetkizbeidi.
«Biz úshin, Densaýlyq saqtaý ministrligi retinde, vaktsina alǵan adamdardyń neǵurlym kóp bolǵany kerek, olardyń aqyly nemese aqysyz ekpe alǵany mańyzdy emes. Bizdiń maqsatymyz – vaktsinalaýmen qamtýdy barynsha arttyrý. Sondyqtan Pfizer-men kelissózder uzaq ýaqyt júrgizildi, biz vaktsinanyń qosymsha kólemin Qazaqstanǵa aqyly negizde satý úshin barlyq múmkindikterdi paidalanýǵa tyrystyq. Biraq, ókinishke qarai, bul kompaniianyń ustanymy – kommertsiialyq negizde jetkizý múmkin emes», - dedi Aijan Esmaǵambetova.
