Petropavldyń 20 jastaǵy turǵyny asa iri kólemde sintetikalyq esirtkimen ustalyp, 10 jylǵa bas bostandyǵynan aiyryldy, dep habarlaidy QazAqparat.
Soltústik Qazaqstan oblysy politsiia departamenti baspasóz qyzmetiniń málimetinshe, 20 jastaǵy petropavldyqty aqpan aiynda esirtki qylmysyna qarsy is-qimyl basqarmasynyń qyzmetkerleri ustady.
Jigitti tintý kezinde odan 397,62 gramm, kópshilikke «tuz» ataýymen belgili «Alfa-PVP» sintetikalyq esirtki tabylyp, tárkilendi. Bul asa iri mólsherge jatady. SQO PD esirtki qylmysyna qarsy is-qimyl basqarmasynyń bastyǵy Jandos Basybaevtyń aitýynsha, bul esirtki myńdaǵan jasty nashaqorlyqqa tartý úshin jetkilikti.
Kúdiktiniń turǵylyqty jerin teksergen politsiia qyzmetkerleri páterden elektrondyq tarazy men býyp-túiý materialdaryn tapty.
Tergeý barysynda jigittiń 2021 jyldyń qyrkúieginen bastap sintetikalyq esirtki satatyn internet-dúkenniń «taratýshysy» retinde «jumys istegeni» anyqtaldy. Telegram messendjeri arqyly saýda júrgizgen ol psihotroptyq zattardyń asa iri partiialaryn birneshe ret qabyldap, olardy arnaiy oryndarda qaldyrý arqyly taratqan. Petropavlda ǵana emes, Qostanai oblysynyń Rýdnyi qalasynda da qylmystyq ispen ainalysqan.
«Eske salamyz, esirtki quraldaryn, psihotroptyq zattardy, sol tektesterdi ótkizý maqsatynda zańsyz daiyndaý, qaita óńdeý, satyp alý, saqtaý, tasymaldaý, jóneltý ne ótkizý - asa aýyr qylmystar sanatyna jatady. Baptyń sanktsiiasy 10 jyldan 15 jylǵa deiin bas bostandyǵynan aiyrý jazasyn kózdeidi. Jeńil jolmen tabys tabamyn dep bolashaǵyńa balta shappa», - deidi Jandos Basybaev.
Qazirgi ýaqytta internet-dúkenniń jumysy toqtatylǵan.
