Petropavl turǵyny, tyl eńbekkeri Liýdmila Nosik 2 bólmeli páterinen aiyryldy, dep habarlaidy "Ult aqparat".
Týystary áleýmettik qyzmetkerdi baspanany syi qujat arqyly óz atyna aýdaryp aldy dep kinálaýda.
Petropavldyń 83 jastaǵy turǵyny, tyl ardageri Liýdmila Nosik qazir týysyn panalap otyr. Qartaiǵan shaǵynda dalada qalǵan jaiy bar. Ájeidiń nemeresi Natalia Seredanyń aitýynsha, zeinetkerdiń 2 bólmeli páterin oǵan 4 ai boiy qyzmet kórsetken áleýmettik qyzmetker syi qujat arqyly óz atyna aýdaryp alǵan. Al páter iesin jekemenshik qarttar úiine tapsyrypty.
«Ájemniń qarttar úiine túskeni jaily quzyrly organnan bizge eshkim habar bergen joq. Tátem ony mekemeden alyp ketýge barǵan kezde bul kisi aýrýhanada júrmin dep oilaǵan. Qolynda azyn-aýlaq kiimi men jeke kýáligi ǵana bolǵan. Qalǵan ózge qujattary joq. 2 bólmeli pátermen qosa áleýmettik qyzmetker shotta jinalǵan qarjyny da iemdendi», - deidi Máskeýden arnaiy kelgen Natalia Sereda.
Liýdmila Nosik 30 jylǵa jýyq temirjolda vagon tekserýshi bolyp jumys istegen. Baspanany kezinde jumys ornynan beripti. Kúieýi ekeýi eki uldy ómirge ákeldi. Olardyń bári erte dúnieden ótipti. Qazir barlyq nemereleri Reseide turady. Sol sebepti 2017-shi jyldan bastap áleýmettik qyzmetkerdiń kómegine júgingen.
«Naýryz aiynyń aiaǵynda áleýmettik qyzmetker ájemizdiń atynan ózine senimhat jasatqan. Osylaisha bar qarajatyn bank kartasynan sheship alǵan. Al sáýirdiń basynda ózine 2 bólmeli páterdi syi qujatpen resimdegen.
Birneshe kúnnen soń ony qarttar úiine aparyp tastaǵan. Qazir ájemiz bala sekildi, bárine senip qalady. Ol áiel osyny paidalanyp qujattarǵa qol qoidyrǵan», - deidi tyl ardageriniń nemeresi.
Natalia Sereda Petropavldaǵy jumyspen qamtý jáne áleýmettik
baǵdarlamalar bólimine bardy. Politsiiaǵa áleýmettik qyzmetkerdiń ústinen aryz túsirdi.
«Áleýmettik qyzmetker ózdiginen eshkimdi Qarttar úiine ornalastyra almaidy. Bizdiń bilýimizshe, Liýdmila Nosik ózim baramyn dep qujat toltyrǵan. Qazir biz munyń qanshalyqty ras ekenin anyqtaimyz. Sonymen qatar, quqyq qorǵaý organdary óz kezeginde bul is alaiaqtyq bolyp tabylady ma, sony tekseredi», - deidi Petropavl qalasy ákiminiń orynbasary Asqar Habibýlin.
Jalpy Petropavlda 500-ge jýyq jalǵyzilikti qart adam turady, olarǵa 78 áleýmettik qyzmetker bekitilgen.
