Petropavlda sý júiesinde taǵy da apat bolyp, qala turǵyndary sýsyz qaldy, dep habarlaidy QazAqparat.

Qaladaǵy M. Jumabaev kóshesinde sý qubyry qaita jaryldy. Apat ornynda túsirilgen video áleýmettik jelide tarady.

Káriz qudyqtarynan tasyp, aǵyp jatqan sý birden kósheni alyp, jeke sektordaǵy turǵyn úilerge qaýip tóndirdi. Turǵyndardyń aitýynsha, qazirgi ýaqytta oblys ortalyǵynyń birqatar aýdanynda sý joq.

Oqiǵa ornynda Petropavl ákimi Rýslan Ańbaev ta júr.

«M.Jumabaev kóshesinde sý qubyry jaryldy. «Qyzyljar Sý» JShS-nyń avariialyq brigadasy jumys istep jatyr. Qazir dalaǵa aqqan sý toqtatyldy, mamandar sebebin anyqtaýda. Qalanyń basym bóliginde sý berý qysymy tómendetildi.

Osy aýdandaǵy 15 úide qazirgi ýaqytta sý joq. Sondai-aq oblystyq balalar aýrýhanasy, beiimdeý ortalyǵy, Petropavl nan-toqash kombinaty men «Sevkazenergo» AQ sýsyz otyr», - dep jazdy áleýmettik jelidegi jeke paraqshasynda Rýslan Ańbaev.

Ákimniń aitýynsha, qala sýsyz qalmaidy. Aldaǵy birneshe saǵatta qubyrdaǵy qysym birtindep kóteriledi. Al apat bolǵan aýdan turǵyndary men áleýmettik nysandarǵa sý jetkiziletin bolady.

«Qyzyljar Sý» JShS de oqiǵaǵa qatysty túsinik berdi.

«Búgin saǵat 18:15 shamasynda M.Jumabaev – S. Muqanov kósheleriniń boiynda D=800 mm sý qubyry jaryldy. Aldyn ala boljam boiynsha eki qubyr jalǵanǵan jer ashylyp ketken, bul qurylys kezinde jiberilgen aqaý bolýy múmkin.

Osyǵan orai sý júiesinde qala boiynsha qysym tómendetildi. Qazirgi ýaqytta apatty joiý boiynsha jumystar júrgizilip jatyr. Magistraldi tiekter jabylǵannan keiin apat bolǵan aýdannan basqa jerlerge sý berý qalpyna keltiriledi.

«Kásiporyn barynsha qysqa ýaqytta sý qubyryn qalpyna keltirýge tyrysady», - dedi «Qyzyljas Sý» JShS bas direktory J. Sultanov.

Petropavlda qarasha aiynyń basynda ǵana sý jelisinde iri apat bolyp, qala birneshe saǵatqa sýdan ajyratylǵan edi.