© Sputnik / Timýr Batyrshin
Petropavl qalasynda zeinetker áiel bir ai boiy memlekettik organdardyń tabaldyryǵyn tozdyryp júr.
Almagúl Esenberdina tehnikalyq aqaýdyń kesirinen biryńǵai bazada óliler qataryna enip ketken, dep habarlaidy Sputnik Qazaqstan agenttigi KTK arnasyna silteme jasap.
Zeinetker "o dúniege attanǵanyn" kezdeisoq bilgen. Josparly operatsiiaǵa daiyndalyp, qujat jinap júrgende derekteri meditsinalyq qyzmetter portalynda qaitys bolǵan adamdar qatarynan tabyldy.
"Men "óldi" degen anyqtamany aldym da, barlyq málimetti tekserip shyqtym. Shynymen de, meni óli adam dep jazyp qoiǵan, áli de eseńgirep otyrmyn", - deidi ol.
Onyń aitýynsha, tehnikalyq aqaýdyń saldarynan aqpan aiyndaǵy zeinetaqyny da bermei qalýy ábden múmkin. Al memlekettik organdar qateni túzetýge asyqpai otyr, biýrokratiia basym.
Zeinetker bir aidan beri túrli instatsiialardyń tabaldyryǵyn tozdyryp júr. Halyqqa qyzmet kórsetý ortalyǵynyń mamandary da kómektese almady.
Olar jeke sáikestendirý nómirin qatysty ózgeristerdi engize almaidy eken.
Zeinetker prokýratýraǵa shaǵym túsirdi. Osydan keiin ólim týraly jazba joiyldy. Oǵan vaktsinatsiialaý pasporty da berildi.
Petropavl qalasynyń prokýratýrasy qatelik jasaǵan memlekettik organdy anyqtady. Ekibastuz qalasynyń azamattyq hal aktilerin tirkeý bóliminiń mamandary qaitys bolǵan adamnyń JSN-yn engizgende bir tsifrdan jańylysyp qalǵan bolyp shyqty. Sodan 2021 jyly 21 jeltoqsanda Almagúl Esenberdina óli adam bolyp jazylyp ketken.
Búginde ólim týraly jazba joiylsa da, zeinetker basqa bazalarda áli de ólgen adam bolyp tirkelýi múmkin.
Zeinetker kúizeliske túskenin jáne densaýlyǵynyń kúrt nasharlaǵanyn jetkizdi. Endi, bir emes, eki operatsiia jasatýy kerek.
Almagúl Esenberdina kináli adamdardan moraldyq shyǵyn óndirip alýǵa múddeli.
