Petropavl qalasynda politsiia qyzmetkerleri zańsyz saqtalǵan temeki ónimderi men spirt iisi bar suiyqtyqtyń iri partiiasyn anyqtap, tárkiledi, dep habarlaidy ult.kz.
Polisia.kz málimetinshe, tekserý barysynda qala ortalyǵyndaǵy saýda úileriniń birinde ornalasqan qoimadan aktsizdik tańbasy joq 15 myńǵa jýyq qorap temeki tabylǵan. Sondai-aq jalpy kólemi 180 litrdi quraityn spirt iisi bar suiyqtyq quiylǵan 36 bes litrlik ydys tárkilendi.
Politsiia málimetinshe, qoimany 54 jastaǵy Petropavl turǵyny jalǵa alǵan. Zańsyz saqtalǵan ónimderdiń barlyǵy tárkilenip, jinalǵan materialdar protsessýaldyq sheshim qabyldaý úshin ýákiletti memlekettik organǵa joldandy.
Vedomstvonyń deregine sáikes, jyl basynan beri Soltústik Qazaqstan oblysynda qoǵamdyq oryndarda mas kúiinde júrgeni nemese alkogol ishkeni úshin 7018 adam ákimshilik jaýapkershilikke tartylǵan.
Sonymen qatar alkogol ónimderin ótkizý qaǵidalaryn buzǵany úshin 152, alkogoldi zańsyz ótkizgeni úshin 166, al etil spirtiniń ainalymy salasyndaǵy zańnamany buzǵany úshin 4 adam jaýapqa tartyldy.
Osy kezeńde zańsyz ainalymnan 7600 litrden astam alkogol ónimi tárkilengen.
Politsiianyń málimetinshe, «Zań men tártip» qaǵidaty aiasynda temeki jáne alkogol ónimderiniń zańsyz ainalymyn anyqtaý jáne onyń jolyn kesý boiynsha jumystar jalǵasyp jatyr.
