Petropavl mańyndaǵy ormannyń birinde jumys istegen zańsyz aǵash kesýshini ormanshylar áleýmettik jelide jariialanǵan foto kómegimen qolǵa túsirdi, dep habarlaidy "Ult aqparat".
Áleýmettik jeli qoldanýshylarynyń biri Petropavl mańyndaǵy áýejaiǵa baratyn ormanda bireýlerdiń aǵash kesip jatqanyn túsirip, saý aǵashtardyń otalyp jatqanyna narazylyǵyn bildirdi. Onyń bul jazbasy kópshilik tarapynan qoldaý taýyp, talqyǵa tústi.
Jazbany áleýmettik jelige monitoring júrgizgen «Qyzyljar orman sharýashylyǵy» KMM qyzmetkerleri de kórgen.
«24 qarasha kúni áýejaiǵa barar joldaǵy ormannan aǵashty artyp jatqan traktordyń sýretin kórdik. Birden oqiǵa ornyna bardyq. Orman sharýashylyǵy aýmaqtyq inspektsiiasymen birge aǵash kesilgen aýmaqty tekserdik.
Biz jyl saiyn ormandardyń jaǵdaiyn anyqtaý boiynsha tekseris júrgizemiz. Bul jerde qurt jegen, qýrai bastaǵan 55 tekshe metr aǵash kesilýi tiis bolatyn. Biraq Ignatenko degen azamatqa bul kólem az bolyp, ol ári qarai aǵashty zańsyz kesken. Osylaisha belgilengen shekaradan shyǵyp, 9 tekshe metr aǵashty ruqsatsyz kesip alǵan. Qazirgi tańda keltirilgen shyǵyn mólsheri esepteldi. Is quqyq qorǵaý oryndaryna berilip, tergeý júrip jatyr. Al qylmys quraldary: balta, ara jáne traktor tárkilenip, politsiiaǵa berildi», - deidi «Qyzyljar orman sharýashylyǵy» KMM jetekshisi Qairat Qalyqov.
Mamannyń aitýynsha, kelgen shyǵyn mólsheri – 254 myń teńge.
Aǵash kesken adam sharýashylyqtyń jumysshysy. Jalpy mundai zańbuzýshylyqtar jii bolyp turady. Biyl Qyzyljar aýdany, Petropavl qalasy boiynsha 5 jaǵdai tirkeldi. Bul – byltyrǵydan 3-4 ese az.
«Bir apta buryn ǵana 20 tekshe metr aǵashty zańsyz keskenderdi ustadyq. Isti sońyna jetkizý úshin aptaǵa jýyq ýaqyt ketti. Kóp jaǵdaida ruqsatsyz aǵash keskenderdi qolǵa túsirý qiyn, ornyn sipap qalamyz. Óitkeni tehnika az, mamandar jetkiliksiz, úlken aýmaqty únemi nazarda ustaý qiyn», - deidi Qairat Qalyqov.
