«Petropavl halyqaralyq áýejaiy» AQ-ny bankrot dep taný protsedýrasy bastaldy. Jergilikti bilik kompaniiany kommýnaldyq menshikke alyp, memlekettik-jekeshelik áriptestikke bermek, dep habarlaidy "Ult aqparat".
Soltústik Qazaqstan oblysy Jolaýshylar kóligi jáne avtomobil joldary basqarmasynyń basshysy Asqar Qylyshbaev búgin «Petropavl halyqaralyq áýejaiy» AQ bolashaǵyna qatysty suhbat berdi.
«Kreditorlyq qaryzǵa bailanysty SQO mamandandyrylǵan aýdanaralyq ekonomikalyq soty kompaniiaǵa jaǵdaidy ońaltýǵa 1 qazanǵa deiin ýaqyt berdi. Bul merzim ótkendikten, endi bankrot dep taný protsedýrasy bastaldy. Isti júrgizý úshin qajet negizi múlik: qondyrý jolaǵy, terminal, qyzmet kórsetý tehnikasy – munyń bári qazir Azamattyq aviatsiia komitetiniń balansynda. Qazir bul múlikti memlekettik ielikten SQO-nyń kommýnaldyq menshigine berý protsedýrasy júrgizilip jatyr. Bul nelikten istelinip jatyr? Keiin memlekettik-jekeshelik áriptestikke berip, investorlardy tartpaqshymyz. Investitsiia kásiporyndy jańǵyrtýǵa jumsalady. Bul – mundaǵy kórsetiletin qyzmet sapasyn arttyryp, naryqqa jańa «oiynshylardy» ákeledi degen úmittemiz. Materialdyq-tehnikalyq baza jaqsarady, qyzmetkerlerdiń eńbekaqysy ósedi. Bul is-shara – Petropavl halyqaralyq áýejaiyn saqtap qalý úshin jasalýda», - deidi basqarma basshysy.
Asqar Qylyshbaevtyń aitýynsha, áýejai qyzmetkerlerine ai saiyn eńbekaqy tóleý úshin ǵana 5-7 mln teńge kerek.
«Áýejai 2014 jyldan jekemenshik kompaniiada boldy. Osy aralyqta onyń sapasy da, reister sany da artqan joq. Áýejai shyǵynsyz jumys isteýi úshin aiyna 64-ten 86-ǵa deiin reis jasalýy kerek. Qazir bar-joǵy 20 reis qana jasalady. Iaǵni, aptasyna 3 reis Almatyǵa jáne 2 reis Nur-Sultan qalasyna bar. Reisterdiń jetispeýshiliginen kreditorlyq bereshek qalyptasty, jalpy somasy 70 mln teńge shamasynda. Onyń ishinde eńbekaqy boiynsha qaryz da bar. Qyzmetkerlerdiń eńbekaqysy ai sońyna deiin beriletin boldy», - deidi SQO Jolaýshylar kóligi jáne avtomobil joldary basqarmasynyń basshysy Asqar Qylyshbaev.
