Resei Ýkraina aýmaǵyndaǵy áskeri qimyldar kezinde edáýir shyǵynǵa ushyrady. Britandyq Sky News arnasyna bergen suhbatynda Kremldiń baspasóz hatshysy Dmitrii Peskov osylai dep málimdedi. Degenmen Kreml ókili Resei naqty qansha soldatynan aiyrylǵanyn aitpady, dep habarlaidy Azattyq.
Ýkraina tóńiregindegi jaǵdaiǵa toqtalǵan Peskov atalǵan el 2014 jylǵy Maidannan keiin ózgergenin atap ótti. Kreml ókili Maidandy "zańsyz tóńkeris" dep atady.
Peskovtyń sózine qaraǵanda, sol oqiǵalardan keiin Ýkraina "antireseishil" memleketke ainalǵan. "Ol jaqta bolyp jatqan nárselerdiń barlyǵy Reseige qarsy baǵyttalǵan" dedi ol.
"Adam shyǵynyn esepke alǵanda Reseidiń Ýkrainadaǵy soǵystan "kóńili qaldy ma?" degen suraqqa Peskov jýrnalistiń bolyp jatqan oqiǵalardy durys túsinbeitinin jetkizdi.
Peskov sonymen birge Ýkraina aýmaǵyndaǵy "arnaiy operatsiia" aldaǵy ýaqytta dittegen maqsatyna jetip aiaqtalady nemese kelissózben bitetin shyǵar dep úmittenetinin jetkizdi.
- 25 naýryzda Resei qorǵanys ministrligi Ýkrainadaǵy soǵysta 1351 orys soldaty qaza bolǵanyn, taǵy 3825 soldat jaralanǵanyn málimdegen. Sodan beri Resei biligi ol jóninde aitpaǵan. Ýkraina qorǵanys ministrliginiń málimetinshe, Resei jaǵy 18 600 áskerinen aiyrylǵan.
- Ýkraina qansha soldaty qaza bolǵanyn jariialaǵan joq. Resei qorǵanys ministrligi naýryzdyń sońynda keminde 14 myń ýkrain soldaty qaza boldy dep málimdegen.
- Áskeri qimyl jalǵasyp jatqan shaqta taraptardyń adam shyǵyny týraly málimetin táýelsiz derekkózderimen tekserý múmkin bolmai tur.
