QR Investitsiialar jáne damý ministrligi «QazAqparat» tilshisine bergen resmi jaýabynda májilismen Azat Perýashevtiń «Nurly jer» baǵdarlamasy boiynsha jataqhanalar salý ideiasyna qatysty pikir bildirdi, dep habarlaidy QazAqparat.
Ministrliktiń málimetteri boiynsha, turǵyn úi baǵdarlamalary úshin («Qoljetimdi baspana» jáne ózegeleri) dálizdik sanattaǵy jobalardy jasaqtaý arqyly turǵyn úi nysandarynyń tipologiiasy keńeitilgen.
Dálizdik sanattaǵy turǵyn úiler sektsiialyq úilerge qaraǵanda, qurylys shyǵyndaryn ortasha eseppen 7-11 protsentke azaitady. Kireberis aýmaǵyn kemitýdiń arqasynda turǵylyqty aýmaq 6,6 protsentke ulǵaiady.
«Dárethana men asúii joq turǵyn úilerge keletin bolsaq, onda kóp adam turatyndyqtan, kóptegen kemshilikteri de bar: jalpy qoldanystaǵy bólmelerde (dárethana, asúi, jýynatyn bólme) sanitarlyq jaǵdaidyń tómendigi, aiqai-shý jáne taǵy basqa yńǵaisyzdyqtar bolady», - dep atap ótti vitse-ministr Roman Skliar atalmysh úilerdiń ekonomikalyq tiimdiligine qatysty jaýabynda.
Degenmen onyń sózinshe, mundai jobalar QR Bilim jáne ǵylym ministrligi arqyly elorda stýdentteri úshin júzege asyrylyp keledi. Olardyń qurylysy memlekettik-jekemenshik seriktestik arqyly jumys berýshilerdiń qarjysyna salynady.
Ministrlikten habarlaǵandai, «Nurly jol» baǵdarlamasynda jataqhana salý boiynsha jeke baǵyt qarastyrylmaǵan.
Aita keteiik, Azat Perýashev depýtattardyń plenarlyq otyrysynda «Nurly jer» baǵdarlamasy boiynsha dárethanasyz jáne asúisiz páter salýdy usynǵan bolatyn. Sol arqyly bólmeler aýdany únemdelip, arzan baspanamen qamtý jumysy jandanady dep esepteidi depýtat.
Perýashevtiń esepteýinshe, jeke ájethana men asúiden bas tartý arqyly turǵyn úi qurylysynda úidiń baǵasyn 40 paiyzǵa tómendetýge bolady.
«Mundai jataqhanalardyń uiymdastyrylǵan qurylysy qazaqstandyqtardy úimen qamtamasyz etýdi arttyrady. Eger «Nurly jer» baǵdarlamasymen 2021 jylǵa deiin 35 myń páter salý josparlansa, dál sol aýdanǵa jataqhana salý arqyly, 49 myń otbasyny úimen qamtýǵa bolar edi», - dep atap ótti Azat Perýashev.
Sonymen qatar, ol úkimetke aýyl jastaryna arnalǵan jataqhanalar keshenin salýdy da usyndy. Sebebi, baspanasyz júrgenderdiń kóbi qalaǵa kelgen aýyl jastary.
«Kez kelgen bazar men qurylys mańynda sanitarlyq emes talaptarda ómir súretinder - aýyldan kelgen jastar. Olar 10-15 adam bolyp páter nemese jataqhanadan bólme jaldaidy», - dedi Májilis depýtaty.
Azat Perýashev resmi kórsetkish boiynsha, úsh aida ýaqytsha tirkeýden ótken 690 myń migrant baryn da aita ketti. Onyń aitýynsha, aýyldan qalaǵa kóship kelgender sany 2,5-5 mln adamǵa jýyq.
«Ishki migranttardyń turǵyn úi máselesin sheshý úshin qosymsha qural qajet. Mundai quraldy jeke tulǵalar burynnan paidalanyp keledi. Olar 15-20 sharshy metrlik bólemeleri bar jáne sanitarlyq bólimderi ortaq shaǵyn jataqhanalar salady. Tek Astananyń ózinde jeke turǵyn úi retinde salynǵan ondaǵan jataqhana bar», - dep sózin aiaqtady ol.
Eske salsaq, buǵan deiin 2017 jyly «Nurly jer» baǵdarlamasy boiynsha, 100 myń páter jalǵa beriledi dep josparlanǵan. 2017-2031 jyldar aralyǵynda barlyǵy 1,5 mln otbasyǵa arnalǵan turǵyn úiler salynady.
Qazirgi ýaqytta, jergilikti atqarýshy organdardyń málimetinshe, 2017 jyldyń 1 qańtaryndaǵy jaǵdai boiynsha, elimizde 428 350 azamat páter kezeginde tur.
