Jeksenbi, 14 aqpan kúni Perý syrtqy ister ministri Elizabet Astete Covid ekpesin kezekten tys qabyldaǵany úshin otstavkaǵa ketetinin málimdedi. Óziniń aitýynsha, ol qytailyq Sinopharm kompaniiasynyń ekpesin elde klinikalyq synaq ótpei turyp jáne jalpyulttyq vaktsinalaý baǵdarlamasy bastalmai jatyp saldyryp alǵan.
Qyzmetine byltyrǵy qarashada taǵaiyndalǵan Astete vaktsinany 22 qańtar kúni alǵanyn, ekpeni qytailyq vaktsinany synaqtan ótkizýge jaýapty Kaetano Eredia ýniversiteti usynǵanyn aitty.
"Qandai aýyr qatelik jasaǵanymdy túsinip otyrmyn. Sol sebepti vaktsinanyń ekinshi dozasyn qabyldamaityn boldym. Osyny alǵa tartyp, prezidentke otstavka jóninde ótinish berdim" dep jazdy ol Twitter-de.
Bir kún buryn el prezidenti Frantsisko Sagasti vaktsina tóńiregindeý ózge bir daýǵa bailanysty densaýlyq saqtaý ministri Pilar Matstsettidiń otstavkasyn qabyldaǵanyn málimdegen. Másele Perýdiń eks-prezidenti Martin Viskarranyń kezekten tys vaktsina alýynan týǵan.
Byltyr qarashada jemqorlyq aiybymen qyzmetinen ketirilgen Viskarra ekpe saldyrý úshin kezekten attamaǵanyn, vaktsinany synaq aiasynda alǵanyn aitqan. Biraq jergilikti basylymdar eks-prezidenttiń túsiniktemesine kúdik keltirdi dep jazdy Reuters agenttigi.
Qańtar aiynyń basynda Perý úkimeti qytailyq Sinopharm kompaniiasymen vaktsinanyń 38 million dozasyn satyp alý jóninde kelisimshart jasasqan. Ótken aptada osy kelisimshart aiasynda tapsyrystyń 300 myń doza kólemindegi alǵashqy bóligi jetkizilgen. Al vaktsinalaý baǵdarlamasy ótken aptanyń seisenbisinde ǵana bastalǵan. Ekpeni birinshi bolyp virýsty medqyzmetkerlerge sala bastady.
Djons Hopkins ýniversitetiniń málimetinshe, indet bastalǵaly Perýde 1,2 million adamnyń Covid infektsiiasyn juqtyrǵany rastalǵan. Onyń 43,7 myńy kóz jumǵan.
