AQSh kongresiniń ókilder palatasy prezident Donald Trampqa "Kapitoliidegi tártipsizdik úshin" impichment jariialaýǵa daiyndalyp jatyr.
Vitse-prezident Maik Penstiń AQSh Konstitýtsiiasyndaǵy 25-túzetýdi paidalanyp, Trampty yǵystyryp, memleket basshysy mindetin ýaqytsha alýǵa quqyǵy bar. Biraq 12 qańtarda Pens bulai isteýden bas tartty.
Osyǵan deiin ókilder palatasynyń spikeri Nensi Pelosi eger vitse-prezident Trampty yǵystyrýdan bas tartsa, 13 qańtarda ókilder palatasy prezidentke impichment jariialaýdy daýysqa salady dep málimdegen.
“Prezidenttiń ókiletiniń aiaqtalýyna 8 kún qalǵan kezde siz ben demokrattar fraktsiiasy úkimet jáne menen 25-túzetýdi paidalanýdy surap otyrsyzdar. Bul ultymyzdyń múddesine sai jáne Konstitýtsiiaǵa sáikes nárse dep oilamaimyn” delingen Penstiń demokrattarǵa arnap jazǵan hatynda.
Al 12 qańtarda Kapitoliidegi tártipsizdikten keiin alǵash ret jýrnalister aldyna shyqqan prezident Donald Tramp demokrattar josparyn aiyptap, bul kóptegen azamattardyń ashýyna tiedi dep málimdedi.
Prezident 6 qańtar kúngi Kapitoliidegi tártipsizdikke qatysy joǵyn aitady. Biraq Tramp qatysqan mitingiden keiin oǵan qatysýshylar Kapitolii ǵimaratyna basyp kirip, Djo Baidenniń jeńisin maquldamaq bolǵan kongrestiń jiynyn buzǵan edi. Tramp mitingide jaqtastaryn kúsh qoldanýǵa shaqyrmaǵanyn aitady. Ol áleýmettik jelilerdiń akkaýntyn buǵattap tastaǵanyn aiyptai sóiledi.
Trampqa alǵash ret 2019 jyldyń aiaǵynda impichment jariialanǵan. Ol kezde prezident "ókiletin asyra paidalandy" dep aiyptaldy. Senatta kópshilik bolyp otyrǵan respýblikashyldar ony aqtap shyǵyp, izinshe Tramp ókiletin jalǵastyra bergen. Bir jyl ishinde prezidentke eki ret impichment jariialaý AQSh tarihynda buryn-sońdy bolmaǵan.
