Qaraǵandy oblysy Sátpaev qalasynda pedofildi soqqyǵa jyqqan politsei kepilzat tólep, bostandyqqa shyqty, dep xabarlaidy QazAqparat.
"Politsiia serjantynyń týǵan-týystarynan kepil tóleý týraly ótinishtiń túsýine bailanysty arnaiy prokýror ony ýaqytsha qamaý abaqtysynan bosatý týraly sheshim qabyldady. Alaida QR Qylmystyq kodekstiń 362-baby - "Qyzmet babyn asyra paidalaný" boiynsha qozǵalǵan isti tergeý amaldary aiaqtalǵansha politsei bostandyqta júre alady. Oǵan Sátpaev qalasynan tys jerge shyǵýǵa bolmaidy. Sondai-aq oiyn-saýyq oryndaryna barýǵa ruqsat joq. Al tergeýshi shaqyrsa, birden kelýi tiis", - deidi Qaraǵandy oblystyq prokýratýranyń baspasóz qyzmeti.
Osy iske qatysty bes jasar qyzdy zorlady degen kúdikpen ustalǵan 50 jastaǵy azamat sotqa deiingi tergeý amaldary aiaqtalǵansha eki aiǵa qamaldy.
Aita keteiik, 23 shilde kúni 40 jastaǵy Sátbaev turǵyny 5 jastaǵy qyzynyń joǵalyp ketkeni týraly habarlaǵan bolatyn. Sol kúni politsiia qyzmetkerleri 50 jastaǵy jergilikti turǵyndy ustady, onyń jatyn bólmesinen 5 jastaǵy búldirshin tabyldy.
Tergeý barysynda pedofil búldirshin qyzǵa zorlyq kórsetý úshin ony aldaǵanyn moiyndady. Ol óz kinásin moiyndaǵannan keiin tergeýshi qujattaryn alyp kabinetten shyǵyp ketedi. Sol kezde bólmede kúdiktimen birge qalǵan serjant laýazymyndaǵy qaraýyldardyń biri ózin ustai almai kúdiktini soqqyǵa jyqqan.
