Bas prokýrordyń orynbasary Marat Axmetjanov pedofilderdi baqylaý sharalary týraly aityp berdi, dep xabarlaidy QazAqparat tilshisi.
«Qazirgi zańnamada pedofilderdi baqylaý sharalary kúsheitilip otyr. Biz olardy únemi baqylaityn bolamyz. Dárigerler ondai adamdardyń jynystyq ózgeristerin jiti qadaǵalaidy. Mysaly, ony túrmeden bosatty deiik. Eger odan qandai da bir qaýip bolsa, onda ximiialyq kastratsiiany taǵy jasaityn bolady», - dedi M.Axmetjanov Astanada ótken baspasóz máslixatynda.
Aita keteiik, Bas prokýrordyń orynbasary 5 myń adamdy túrmeden bosatýǵa qatysty túsinik berdi.
«Búginde áleýmettik jelilerde shyndyqqa janaspaityn aqparattar taralýda. «Aýyr qylmys jasaǵan 5 myń adam bostandyqqa shyǵady. Olar zorlyq jasaǵan, adam óltirgen, qaraqshylyq jasaǵandar» deidi. Buqaralyq aqparat quraldaryna da jańalyqtar shyqty. Bunyń barlyǵy shyndyqqa janaspaidy. Bireýler máseleniń anyq-qanyǵyna mán bermedi, endi bireýler sensatsiia jasaimyz dep, solai berdi. Sonyń saldarynan qoǵam ol jańalyqty durys túsinbei qaldy», - dep atap kórsetti M.Axmetjanov.
Onyń aitýynsha, 5 myń adamnyń ishinde qaraqshylar, pedofilder, zorlyq jasaǵandar, adam óltirgender joq.
