foto: Nartai Sársenǵaliev. Májilis baspasóz qyzmeti
Májilistiń jalpy otyrysynda Nartai Sársenǵaliev pedagogtardyń máselesin kóterip Qazaqstan Respýblikasynyń Premer-Ministri Oljas Bektenovke depýtattyq saýal joldady, dep habarlaidy Ult.kz.
Nartai Sársenǵalievtiń aitýynsha:
Qazir oqýshyǵa áleýmettik ádilettilikti úiretetin áleýmettik pedagogtarǵa ádiletti kózqarastyń joqtyǵy qarapaiym qarashany qatty qapa qylady”.
Sondai-aq, depýtat pedagog mamandardyń jalaqysy týraly da aitty:
“Qańtarda mektepterdi aralap ujymmen kezdestim. Sol kezde olardyń janyn aiazdai qaryǵan másele: áleýmettik pedagogtardyń azǵantai ailyǵy men bilim ordalaryndaǵy qarapaiym qyzmetkerlerdiń túkke jetpeitin jalaqysy ekeni aityldy.
Birinshiden, áleýmettik pedagogtardy V3 fýnktsionaldyq blogynan V2 fýnktsionaldyq blogyna aýystyrý kerek dep 2023 jyly Májilis minberinen aittyq, naqty usynystar berdik. Biraq Úkimet bul máseleni áli sheshken joq. Áleýmettik pedagogtyń mindetine zer salǵan adam olardyń talabyn tap basyp túsiner edi. Máselen, bir áleýmettik pedagog 1500-2000 balamen jumys isteimin deidi. Mekteptegi oqýshylardyń tamaqtaný tártibin jasaqtaý, oqýshylardyń qujattaryn jinaý, mektepke jol aktsiiasyn júzege asyrý, dinamikalyq baqylaýda turatyn oqýshylarmen jumys isteý, lagerge joldama alǵan balalardyń qujattaryn daiyndap, barǵan balalardy qadaǵalaý, qajet bolsa jumystan keiin úi aralaý, erekshe bilimdi qajet etetin oqýshylarmen jumys isteý de áleýmettik pedagogtardyń moinyna artylǵan. Bul bir mamannyń jipke tizgeni. Osynsha qyzmeti úshin alatyn ailyǵy qazir 118 myń teńge. 2 jyl buryn talap etkenimdei áleýmettik pedagogtardy V2 fýnktsionaldyq blogyna aýystyrsa olardyń ailyǵy 150 000 teńge bolar edi”,- dedi Nartai Sársenǵaliev.
Sonymen qatar depýtat birneshe talap qoidy:
“Bul bastamaǵa qarjy qat degen Úkimet ókiliniń jaýabynan soń resmi eseptettim, 2023-2024 oqý jylynda elimizde «Bilim berý» salasy boiynsha «V3» blogyna jatatyn 4 775 áleýmettik pedagog bar eken.
Bul sanatqa «V3» blogyna jatatyn 70 847 tárbieshi; mektepaldy daiarlyq tobynyń/synybynyń 9360 pedagogy; qosymsha bilim berýdiń 3672 pedagogy; 1678 uiymdastyrýshy pedagog; 1434 kásibi baǵdar berýshi pedagog; 1903 pedagog-assistent; 4023 pedagog - psihologtar (mektepten basqa); dene shynyqtyrý boiynsha 3555 nusqaýshy; 6076 mýza.beineleý óneriniń basshylary men pedagogtary; 5140 ádisker; 889 arnaiy pedagogtardy qosa alǵanda, jalpy memlekettik bilim berý uiymdarynyń 113 352 pedagogy V 3 blogyna jatady. Osy mamandardyń barlyǵyn V3 blogynan V2 blogyna aýystyrsaq jylyna biýdjetten shamamen 55 mlrd teńge qosymsha jumsalady eken. Urpaqqa bilim men tárbie beretin mamandardan aiaityn aqsha emes bul. Bul birinshi talap!
Ekinshi másele, bilim berý uiymdaryndaǵy eden jýýshy, aýla sypyrýshy, vahter, kir jýǵysh mashinanyń operatory, aspaz, júrgizýshi, elektrik syndy mamandar men tehnikalyq personaldyń jalaqysy óte az. Ailyǵy shailyǵynan artylmaityn azamattar qaryzdanyp qaýǵalanyp ómir súrýge májbúr.
Bilim berý uiymdaryndaǵy tehnikalyq personal qyzmetkerleriniń jalaqysy 2024 jyly 71%-ǵa, 2025 jyly 100% - ǵa ósedi degen resmi málimetti bárimiz bilemiz. Biraq sonyń ózinde atalǵan azamattardyń ailyǵy elimizdegi ortasha jalaqy turmaq medianalyq jalaqy deńgeiine jetpeidi. Bul áleýmettik ádiletsizdik, sony joiyp jumysshylardyń jalaqysyn kóterý kerek!
Atalǵan 2 talapty oryndaý úshin Qazaqstan Respýblikasy Úkimeti «Azamattyq qyzmetshilerge, memlekettik biýdjet qarajaty esebinen ustalatyn uiymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júiesi týraly» Qazaqstan Respýblikasy Úkimetiniń 2015 jylǵy 31 jeltoqsandaǵy № 1193 Qaýlysyna tiisti ózgerister men tolyqtyrýlar engizilsin. Jáne basqa da biýdjettik mekemelerdegi jalaqy teńsizdigi zerdelensin.
Oqý-aǵartý ministrligi Ulttyq ekonomika ministrligimen jáne Qarjy ministrligimen birlese otyryp, jumysshy sanatyndaǵy tehnikalyq qyzmetshilerge eńbek demalysyna tólenetin tólem mólsherine saýyqtyrý járdemaqysyn qosý múmkindigin qarastyryp, respýblikalyq biýdjetten shyǵyndardy eseptesin.
Biylǵy jyldy Memleket basshysy «Jumysshy mamandyqtar jyly» dep jariialady. Men jipke tizgen mamandar jumysshy mamandyq emei nemene? Endeshe olardyń jalaqysyn biyl kótermegende qashan kóteremiz?
Osy depýtattyq saýalǵa zańnamada belgilengen merzim ishinde jazbasha jaýap kútemiz”,- dedi depýtat Nartai Sársenǵaliev.
