Byltyr bilim salasyndaǵy kásipodaq múshelerinen zańsyz ustalǵan jáne tólenbegen 1,4 mlrd teńge qaitaryldy. Qazaqstandyq salalyq bilim jáne ǵylym qyzmetkerleriniń baspasóz qyzmeti osyndai málimet taratty, dep habarlaidy QazAqparat.
Qazaqstannyń bilim salasynda 500 myńnan astam kásipodaq múshesi jumys isteidi. Atalmysh salalyq kásipodaq ókilderi ótken jyldyń qorytyndysyn shyǵarǵan eken.
«Ótken 2021 jyly eńbek zańnamasynyń oryndalýyn qoǵamdyq baqylaý sheńberinde bilim kásipodaǵy 1 730 tekserý júrgizdi. Onyń ishinde 2 797 eńbek zańnamasynyń buzylýy anyqtaldy. Onyń eńbekaqy tóleý boiynsha – 783, eńbek qatynastaryn resimdeý boiynsha – 798 jáne jumys ýaqyty men demalys ýaqyty rejimi boiynsha – 363 zańsyzdyq tirkeldi. Múshelik uiymdar men salalyq keńestiń quqyqtyq qyzmetiniń kómegimen zańsyz jumystan shyǵarylǵan 17 qyzmetker jumysqa qaita alyndy», - delingen habarlamada.
Sondai-aq, kásipodaq organdarynyń talaby boiynsha kásipodaq múshelerine 1,4 mlrd teńge mólsherinde zańsyz ustalǵan nemese tólenbegen aqsha qaitarylǵan.
«Quqyqtyq máseleler boiynsha 21141 keńes berildi. 2022 jylǵy 1 qańtardaǵy jaǵdai boiynsha sala uiymdarynda eńbek qaýipsizdigi jáne eńbekti qorǵaý jónindegi 8 363 óndiristik keńes jumys isteidi. Tehnikalyq inspektorlar eńbek jaǵdailary boiynsha 3825 tekserý júrgizdi. Júrgizilgen jumystardyń nátijesinde salada jaraqattaný kórsetkishi 10-nan 8-ge deiin tómendedi», - dep jazady kásipodaq ókilderi.
