Pedagog mamandyqtaryna túsetin talapkerler úshin shekti ball biyl taǵy joǵarylaidy. Bul týraly Qazaqstan Respýblikasynyń Bilim jáne ǵylym ministri Ashat Aimaǵambetov pedagogikalyq joǵary oqý oryndarynyń stýdentterimen kezdesýi barysynda málim etti, – dep habarlaidy Ministrliktiń baspasóz qyzmeti.
Ashy dialog formatynda ótken stýdenttermen kezdesýde Ashat Aimaǵambetov bilim salasy úshin mańyzdy eki qujattyń qabyldanǵanyn atap ótti. Olar - 2020-2025 jyldarǵa arnalǵan bilim men ǵylymdy damytýdyń jańa memlekettik baǵdarlamasy jáne «Pedagog mártebesi týraly» QR Zańy. Ministr pedagog qyzmetkerlerdiń jumys jaǵdaiyn jaqsartý jáne bilim sapasyn arttyrýmen jańartylǵan bilim baǵdarlamasynyń artyqshylyqtary týraly áńgimeledi.
«Qabyldanǵan zańǵa sáikes, pedagogty oqytý men tárbieleýdiń avtorlyq ádisterin ázirleý jáne qoldaný, oqý quraldaryn tańdaý, aqparattyq resýrstardy tegin paidalaný, biliktilikti arttyrý jáne taǵylymdamadan ótý nysandaryn tańdaý bóliginde kásiptik quqyqtary keńeitiledi. Mektep muǵalimderiniń sapaly quramyn arttyrý úshin magistr dárejesi bar tulǵalarǵa 10 AEK kóleminde qosymsha aqy qarastyrylǵan. Sonymen qatar, dápter tekserýmen synyp jetekshilik úshin 2 ese aqy, tálimgerlik pen pedagogikalyq sheberlikke arnalǵan qosymsha aqylar kózdelgen», - dedi Ashat Aimaǵambetov.
Aita ketken jón, pedagogikalyq sheberliktiń biliktiligine qosymsha aqy barlyq pedagogtar úshin laýazymdyq jalaqydan 30-dan 50%- ǵa deiingi mólsherde belgilenedi. Kezdesýde Ashat Aimaǵambetov joǵarǵy oqý ornyna pedagog mamandyqtary boiynsha túsýde shekti ball joǵarylaityndyǵyn habarlady. Máselen, 2019 jyly pedagogikalyq mamandyqtarǵa túsýge shekti ball 60 balǵa deiin ósken. Endigi kezekte 2020 jyly shekti mejeni 70 balǵa deiin kóterý josparlanýda.
«Búgingi tańda eń úzdik mektep túlekteriniń arasynda muǵalim mamandyǵy aitarlyqtai suranysqa ie bolmai otyr. Osy rette talapkerler tarapynan daiarlaýdyń pedagogikalyq baǵyttary sirek tańdalyp jatady. Bilim berý granttaryn taǵaiyndaý konkýrsyna qatysý úshin ótinish bergen kezde talapkerler kóbinese pedagogikalyq baǵyttardy úshinshi jáne tórtinshi qylyp kórsetedi», - dedi ministr.
Vedomstvo basshysynyń aitýynsha, talapkerlerdi pedagogikalyq mamandyqtarǵa tartý úshin ótken jyly QR BǴM-men birqatar naqty sharalar qabyldandy. Budan bólek, ministr 2021 jyldan bastap joǵary oqý oryndarynyń memlekettik úlgidegi emes, jeke úlgidegi (áskeri jáne arnaiy oqý oryndaryn qospaǵanda) diplom berýi týraly norma kúshine enetinin aitty. Bul joǵary oqý oryndary arasyndaǵy básekelestikti arttyryp, usynylatyn bilim berý qyzmetteriniń sapasyna qatysty jaýapkershiliktiń ósýin qamtamasyz etpek.
«Endi jumys berýshiler diplomǵa emes, túlektiń quzyretiligine kóbirek kóńil bóledi. Jumysqa ornalastyrý kezinde joǵary oqý ornynyń bedeli men imidji basty ról atqarady. Stýdentter men ata-analardy joǵary oqý ornyn tańdaýda muqiiat bolýǵa shaqyramyz», - dedi A. Aimaǵambetov.
