Búgin memleket basshysy Qasym-Jomart Toqaevtyń qatysýymen Ulttyq keńestiń III otyrysy ótti. Otyrys barysynda el prezidenti ustazdardyń jaǵdaiyna keńirek toqtalyp, muǵalimder men oqýshylardyń bedelin kóterý kerektigin aityp ótken edi. Osy oraida BQO Shyńǵyrlaý aýdany Segizsai negizgi mektebiniń ustazy Aigúl Jetmekova memleket basshysynyń sózine ún qosyp, eldegi bilim salasyndaǵy reformalarǵa qatysty pikirin bildirdi, dep habarlady Strategy2050.kz tilshisi.
Aigúl Jetmekova Segizsai negizgi mektebinde qyzmet etkenine 20 jyldan asty. Onyń sózinshe, Toqaevtyń búgingi otyrysta aitylǵan bilim salasyna qatysty ózgerister tek ustazdardyń ǵana, búkil qoǵamnyń kóńilinen shyqty.
"Jalpy muǵalimniń bedelin arttyryp, mártebesin kóterý kez-kelgen memlekettiń bilim berý saiasatynyń basty baǵyttarynyń biri. Búgingi Ulttyq keńestiń otyrysynda memleket basshysy Qasym-Jomart Toqaevtyń ustazdardyń bedelin kóterý, bolashaq pedagogtardyń stipendiiasyn 26 000 teńgeden 42 000 teńgege deiin arttyrý qajet degeni, ustazdardyń eńbegin baǵalap, "Halyq alǵysy" atty jańa medaldy bekitý - tek men sekildi ustazdar qaýymyn ǵana emes, barlyq qoǵam múshelerin, azamattardy qýantty desem artyq aitqandyq emes. Bunyń bári ustazdardyń jaqsy jumys isteýine, bilim berýdegi jańa ádis-tásilderdi igerýine stimýl bolmaq", - dedi Aigúl Jetmekova.
Onyń sózinshe, memleket basyshysynyń bastamasymen qolǵa alynǵan bilim salasyndaǵy reformalar ustazdyń bedelin arttyryp, abyroiyn asqaqtady.
"Qazirgi tańda memleket basshysy Qasym-Jomart Toqaevtyń jáne Bilim jáne ǵylym ministrliginiń bastamasymen qazaqstandyq bilim berý salasynda birqatar ózgeris jasalyp jatyr. "Pedagog mártebesi týraly" zańynyń qabyldanýy da elimizdiń bilim salasyn jańa deńgeige kóterip, ustazdardyń abyroiyn arttyryp, jańa shyǵarmashylyq izdenisterge bastaidy dep senem. Sonymen qatar biyldan bastap pedagogikalyq mamandyqtarǵa tapsyrýshy túlekter úshin shekti baldyń artýy da mamandyqqa degen qurmetti arttyrary sózsiz. Endi tek mamandyqty, balalardy jaqsy kóretin mamandar kelse degen tilek meniki. Sondyqtan mundai máselelerdiń biik minberde aitylýy oryndy", - dedi ol.
Sonymen birge Aigúl Jetmekova pedagogikalyq mamandyqty bitirgen túlekterdiń nege muǵallimdikke qyzmetke bairmaitynyna toqtalyp ótti. Onyń aitýynsha, basty másele jalaqyda.
"Memleket basshysynyń tapsyrmasyna sáikes aldaǵy tórt jylda ustazdarǵa tólenetin jalaqyny eki ese arttyrý qarastyrylǵan. Bul da túlekterdiń ustazdyq mamandyqty tańdaýyna sebep bolary anyq. Mysaly, qazir aramyzda pedagogikalyq mamandyqty aiaqtap, alaida ustazdyq qyzmetten bas tartaqandar sany emes. Onyń bári jalaqyǵa bailanysty dep oilaimyn. Eger jalaqysa ósse, mamandyqqa tapsyratyndardyń da sany artady. Sonymen qosa Toqaev qala men aýyl mektepterdegi bilim berýdiń alshaqtyǵyn da aityp ótti. Ol aitqandai, barlyq balalar turǵylyqty jerine nemese áleýmettik jaǵdaiyna qaramastan sapaly bilimge qol jetkizýi kerek", - dep túiindedi ol.
