Qazaqstanda paidalanylmai jatqan aýyl sharýashylyǵy jerlerin jappai memleketke qaitarý jalǵasyp jatyr. Bul týraly Úkimettiń baspasóz qyzmeti habarlady.
QR Aýyl sharýashylyǵy ministrliginiń kúshimen 2022 jyldyń 6 aiynda 904 myń ga paidalanylmaǵan nemese zańnamany buza otyryp berilgen jer memleket paidasyna qaitaryldy (2021 jyly 430 myń ga qaitarylǵan). Jyl sońyna deiin taǵy 5 mln ga-ǵa deiin paidalanylmaityn aýyl sharýashylyǵy jerlerin qaitarýdy qamtamasyz etý josparlanyp otyr.
"Memleket basshysynyń tapsyrmasy boiynsha paidalanylmaǵan jáne zańnamany buza otyryp berilgen jerlerdi qaitarý jónindegi jumys komissiiasy quryldy. Qazirgi ýaqytta birneshe baǵyt boiynsha jumystar qatar júrgizilip jatyr: barlyq oblysta quqyq qorǵaý jáne memlekettik organdardy tarta otyryp vedomstvoaralyq toptar quryldy; 7,45 mln ga alańda 2 584 sýbektige qatysty «jappai qaýip» sheńberinde Jer resýrstaryn basqarý komitetiniń aýmaqtyq bólimsheleriniń tekserýler júrgizýin kózdeitin aýyl sharýashylyǵy ministriniń buiryǵy qabyldandy. 1 mln 517 myń ga alańda jer paidalanýshylarǵa qatysty 601 jospardan tys tekserý júrgizildi, 680,9 myń ga jerge qatysty taǵy 57 material QR Bas prokýratýrasynyń Quqyqtyq statistika jáne arnaiy esepke alý jónindegi komitetiniń basqarmalarynda tirkeý satysynda tur. 2021 jyly 210 myń ga alańda jer paidalanýshylarǵa qatysty 177 jospardan tys tekserý tirkeldi" - delingen habarlamada.
Memleket paidasyna qaitarylǵan jerlerdi odan ári agrarlyq sektor ókilderine tikelei paidalanýǵa berý úshin jergilikti atqarýshy organdar (ákimdikter arqyly) bóledi.
