Bul týraly búgin Memlekettik qyzmet isteri jáne sybailas jemqorlyqqa qarsy is-qimyl agenttiginiń resmi ókili Nurlan Jahin málim etti, dep habarlaidy QazAqparat tilshisi.
Onyń aitýynsha, Sybailas jemqorlyqqa qarsy is-qimyl ulttyq biýrosy asa iri kólemde para alý kúdigimen Pavlodar oblystyq memlekettik kirister departamentiniń basshysy Baiqurmanov pen atalǵan departamenttiń ekonomikalyq tergeý qyzmetiniń basshysy Beisembaevty ustaǵan.
«31 tamyzda jasyryn tergeý sharalaryn júrgizý barysynda atalǵan tulǵalar osy jyldyń naýryzynda qozǵalǵan qylmystyq isti toqtatý jáne 1,1 mlrd teńgelik salyqty salmaý úshin JShS ókilinen 100 myń AQSh dollaryn qaitadan qaitarý barysynda qylmystary áshkerelengen. Kúdiktilerdiń turǵylyqty jerlerinde, kabinetterinde, jumys oryndarynda tintý jumystary júrgizildi. Sonyń nátijesinde aqsha qarajattary men baǵaly zattar tabyldy. Atap aitqanda, 160 myń AQSh dollary, 10,5 mln teńge jáne 9 jup qymbat shveitsarlyq saǵat alyndy», - dedi Nurlan Jahin.
Resmi ókildiń sózine qaraǵanda, sol kúni kúdiktiler ustalyp, Pavlodar qalalyq IID ýaqytsha oqshaýlaǵyshyna qamalǵan. Al 3 qyrkúiekte kúdiktilerdiń ekeýi de Pavlodar qalalyq tergeý sotynyń sanktsiiasymen qamaýǵa alynǵan.
«Kúdiktiler tarapynan aqsha qarajattaryn zańsyz alý ótinish berýshiniń túsinigi boiynsha, sondai-aq basqa kýágerlermen jasyryn tergeý áreketteriniń materialdary arqyly rastalyp otyr. Sotqa deiingi tergeý asa iri kólemde para alý baby boiynsha júrgizilip jatyr», - dedi ol.
Nurlan Jahinniń aitýynsha, kúdiktilerdiń laýazymdy memlekettik qyzmette bolý múmkinshilikteri shekteledi. Sonymen qatar paranyń 70-80 eselengen somasy mólsherinde aiyppul salynýy múmkin nemese 10-15 jylǵa deiin bas bostandyǵynan aiyrý jazasyna iligedi.
Eske sala ketsek, Pavlodar oblystyq Memlekettik kirister departamentiniń (MKD) basshysy Ernur Baiqurmanov, MKD oblystyq basqarmasy tergeý bóliminiń basshysy Azamat Beisembaev jáne jedel ýákil D.Maǵzumov 100 myń AQSh dollary kóleminde para aldy degen kúdikpen ustalǵanyn buǵan deiin habarlaǵan bolatynbyz.
