Pavlodar qalasyndaǵy «Jas daryn» mamandandyrylǵan mektebiniń 11-synyp oqýshysy Alar Berikuly qoljazbany tsifrlyq formatqa kóshiretin qosymsha jasap shyǵardy, dep habarlaidy Pavlodarnews.kz saity.
Karantin ýaqytynda qashyqtan oqyp, ǵylymi izdenisterin damytqan jas ónertapqysh sol arqyly mektep arhivin tsifrlandyrýǵa úles qosýǵa tyrysqan.
«Android júiesine arnalǵan baǵdarlama eki ai ishinde Java platformasynda OpenCV jáne DL4J ashyq kitaphanalary negizinde jasaldy. Meni neirondyq jeliler qyzyqtyrady. Basynda Java arqyly jańadan neirondyq jeli qurastyrǵan edim. Alaida ondaǵy úirený men boljaý jyldamdyǵy tómen bolǵandyqtan, jumysty DL4J-ǵa kóshirdim», - deidi Alar Berikuly.
Jasandy intellekt salasynda jańalyq ashýdy maqsat tutqan oqýshyǵa Toraiǵyrov ýniversitetiniń dotsenti Dariia Ábikenova kómektesken.
Baǵdarlamanyń jumys printsipine kelsek, atalǵan mobildik qosymsha qazaq tilindegi qoljazbalardy skanerlep, ony elektrondyq formatqa kóshiredi. Sol arqyly eski qujattar men hattardy qaita terýdiń qajeti bolmaidy.
«Baǵdarlamany áli damytýǵa bolady. Mysaly, dáriger retseptin oqyǵan adamdar meditsinalyq terminderdi izdep áýre bolady. Baǵdarlama bólek jazylǵan sózderdi ǵana tani alady. Biraq keibir adamdar olai jazbaidy. Sol sebepti qoljazba mátin men rekkýrentti neirondyq jelini biriktirý arqyly kez kelgen qoljazbany erkin tani alatyn júie jasaýǵa bolady», - deidi Alar Berikuly.
11-synyp oqýshysynyń ustazy Aidar Shaihimov aityp ótkendei, qosymsha tolyǵymen ázir bolyp, patent alynǵannan soń Play Market-te ornalastyrylady. Aitýynsha, «Jas daryn» mektebiniń oqýshylary odan bólek, E-kitaphana jáne E-ashana baǵdarlamalaryn jasaǵan. Olarǵa basqa mektepter de qyzyǵýshylyq tanytýda.
Qazaqstannyń ǵylymyna úles qosýǵa bekingen Alar Berikuly aldaǵy ýaqytta IT nemese neirondyq jeliler salasynda izdenisterin jalǵastyrýǵa nietti.
