Foto: ashyq derekkóz
Prokýratýra óńirdegi sport nysandaryna keshendi tekserý júrgizip, birqatar zańbuzýshylyqty anyqtady. Tekserý stadiondar, basseinder, sport mektepteri, muz aidyndary men fýtbol manejderin qamtyǵan, dep habarlaidy Ult.kz.
Qadaǵalaý barysynda sporttyq qurylystardyń zańsyz túrde jeke tulǵalardyń ieligine berilgeni belgili boldy. Atalǵan nysandar kommertsiialyq maqsatta paidalanylǵanymen, jaldaý aqysy tólenbegen.
Máselen, Pavlodar qalasynda hokkei korty úsh jyl boiy tegin qoldanylyp, kommýnaldyq shyǵyndar biýdjet esebinen ótelgen.
Sondai-aq sport mektepteriniń qyzmetinde jalpy somasy 10 million teńgege jýyq urlyq pen jalǵan tólemder faktileri tirkeldi. Atap aitqanda, bir aýdanda býhgalter úsh jyl ishinde ózine zańsyz túrde shamamen 6 million teńge aýdarǵan. Bul derek boiynsha QR Qylmystyq kodeksiniń 189-baby 3-bóligimen qozǵalǵan qylmystyq is sotta qaralyp jatyr.
Tekserý kezinde sport uiymdarynda jalǵan diplomdary bar jattyqtyrýshylardyń, sondai-aq buryn halyq densaýlyǵy men imandylyqqa qarsy qylmystar úshin jaýapkershilikke tartylǵan qyzmetkerlerdiń jumys istegeni de anyqtaldy.
Budan bólek, sportshylardy shyn máninde joq qonaqúilerge ornalastyrý týraly jalǵan sharttar jasalyp, memleketke 2,8 million teńge kóleminde zalal keltirilgen.
Prokýratýra málimetinshe, tekserý nátijeleri sport nysandarynyń basym bóligi tozǵan kúide ekenin kórsetti. Atap aitqanda, tribýnalardyń qiraýy, shatyrlardyń aǵýy, múmkindigi shekteýli adamdarǵa jaǵdaidyń jasalmaýy, sanitarlyq jáne órt qaýipsizdigi talaptarynyń saqtalmaýy tirkelgen.
Atalǵan zańbuzýshylyqtardyń barlyǵy boiynsha olardy joiý jáne kináli tulǵalardy jaýapkershilikke tartý maqsatynda qadaǵalaý aktileri engizildi.
