Pavlodar oblysynyń ákimi Ábilqaiyr Sqaqov aimaqtaǵy ekologiialyq ahýaldy jaqsartý josparyn bólisti, dep habarlaidy "Ult aqparat".
«Shynynda da, Pavlodar oblysynda ekologiialyq baǵytta ótkir máseleler bar. Biz bul problemalardy sheshý úshin 4 baǵytta jumys júrgizemiz: birinshisi – ónerkásip kásiporyndarynyń shyǵaryndylaryn shekteý. Ekinshi blok – qatty turmystyq qaldyqtarmen jumys júrgizý baǵdarlamasy. Úshinshisi – kógaldandyrý jumysy. Tórtinshi blok – ekologiialyq máselelerdi kóterip júrgen azamattarmen ózara jumysty kúsheitý», - dedi Ábilqaiyr Sqaqov OKQ-da ótken baspasóz máslihatynda.
Ol sonymen qatar ekologiialyq keńes pen aimaqtaǵy kásiporyndarǵa jańa súzgi ornatý isine toqtalyp ótti.
«Bizdiń óńirde ekologiialyq keńes jumys istep tur. Taiaýda ǵana biz osy keńestiń otyrysyn ótkizip, tórt birdei jumys tobyn qurdyq. Bul jumys toptary jergilikti atqarýshy organdarmen, aýmaqtyq organdarmen, Ekologiia, geologiia jáne tabiǵi resýrstar ministrligimen tyǵyz jumys júrgizedi. ERG kompaniialar tobynyń iri kásiporyndarynda shyǵaryndylardy azaitýǵa baǵyttalǵan on jyldyq baǵdarlama júzege asyrylyp jatyr. Olar ózderiniń eskirgen súzgilerin jańǵyrtyp, olardyń ornyna gibridtik jabdyqtardy ornatyp jatyr. Bul baǵytta qazirdiń ózinde nátije bar – Pavlodardaǵy aliýminii zaýytynda eki birdei súzgi ornatyldy. Osy gibridti súzgiler syrtqa shyǵarylatyn shyǵaryndylardyń kólemin jylyna 2,4 myń tonnaǵa deiin azaitady. Bul baǵdarlama 10 jylǵa deiin jalǵasady», - dedi ol.
Odan bólek óńirde kógaldandyrý jumysyna basa nazar aýdarylyp, kelesi jyldan bastap oblys ortalyǵynda biiktiki 1,5-2 metrlik 20 myń túp aǵashty egý jumystary bastalady.
Bul baǵdarlamany Ekibastuz ben Aqsý qalalary da qolǵa alǵaly otyr. Osylaisha óńir biligi qorshaǵan ortanyń lastaný máselesin birtindip retteýdi kózdep otyr.
