Pavlodar mańyndaǵy kúre jolda eki kólik soqtyǵysyp, bireýi órtene bastaǵan. Barlyq jolaýshylar syrtqa júgirip shyqty, tek bireýiniń aiaǵy qysylyp, shyǵa almai qaldy, dep habarlaidy "Ult aqparat".
«Úshinshi qarasha kúni saǵat 17:30 shamasynda Pavlodar-Ekibastuz kúre jolynyń onynshy shaqyrymynda, Leninskii kentiniń mańynda «Toyota-Emina» kóligin júrgizip kele jatqan 30 jastaǵy áiel ainalyp ótý kezinde «Aýdi S -100» markaly kólikpen soqtyǵysqan. Jol-kólik oqiǵasy saldarynan ekinshi kólik órtene bastady», - dep habarlady tilshilerge Pavlodar oblystyq politsiia departamentiniń baspasóz qyzmetinen.
Oqiǵa ornyna Pavlodar-Leninskii baǵdary boiynsha patrýldik qyzmet júrgizgen aǵa leitenant Azat Qaiyrbekov pen Erbol Aiǵojin kelip jetti.
«Aǵa leitenant Azat Qaiyrbekov oqiǵa týraly dereý habarlap, órt sóndirý qyzmeti men jedel járdemdi shaqyrtty. Politsiia qyzmetkeri Erbol Aiǵojin kólikke qarai júgirdi, ondaǵy barlyq jolaýshylar ózderi shyǵyp úlgerdi, arasynda bir jas er adam ǵana aiaǵy otyratyn oryn men paneldiń arasyna qysylyp, shyǵa almai turdy», - dep qosyp ótti baspasóz qyzmetinen.
Jalyn kóliktiń salonyna tarai bastady. Gazben júretin kólik kez kelgen sátte jarylýy múmkin edi. Aǵa leitenant Aiǵojin jolaýshynyń aiaǵyn bosatyp, joldyń jiegine jetýge kómektesti. Birneshe minýttan soń kólik tolyq órtenip ketti.
«Politseiler qaýipsizdikti saqtaý maqsatynda adamdardy joldyń jiegine shyǵaryp, shoshynyp qalǵandardy tynyshtandyrdy. Oqiǵa ornyna kelip jetken órt sóndirý kóligi órtti sóndirdi», - dep qosty baspasóz qyzmetinen.
Tótenshe jaǵdai saldarynan jaraqat alǵan «Aýdi S – 100» kóliginiń eki jolaýshysy aýrýhanaǵa jetkizildi. Kólik aiyp turaǵyna qoiyldy, tekseris júrgizilip jatyr.
