Pavlodarda órt sóndirý kóligi mektep avtobýsymen soqtyǵysty, dep habarlaidy QazAqparat Pavlodarnews.kz saityna silteme jasap.
Oblystyq Politsiia departamenti baspasóz qyzmetiniń aqparatyna sai, búgin saǵat 14:15-te Elgin men Shedrin kósheleriniń qiylysynda «KamAZ» markaly órt sóndirý kóligi «PAZ-32053-70» markaly mektep avtobýsymen soqtyǵysqan. Avtobýs inertsiiamen turaqta turǵan «Volkswagen» jeńil avtokóligine soǵylǵan.
Jol-kólik oqiǵasy saldarynan kámelettik jasqa tolmaǵan 6 bala meditsinalyq kómekke júgindi.
«Tekseris júrip jatyr. Saraptamalar taǵaiyndaldy», - delingen politsiia habarlamasynda.
Oblystyq jedel járdem stantsiiasynyń baspasóz qyzmetinen málim etkendei, shaqyrtý týraly habar saǵat 14:19-da tústi. Eki jedel járdem brigadasy oqiǵa ornyna 7 minýtta jetken.
Zardap shekken barlyq bala oblystyq balalar aýrýhanasyna jetkizildi.
