Baýyr eti balasyn qoqysqa tastai qashqan ana endi "qasaqana kisi óltirýge baǵyttalǵany" úshin jaýapqa tartylady. Pavlodarlyq tergeýshiler isti osy bap boiynsha júrgizip jatyr. Al dúisenbi kúni tabylǵan ul balany dárigerler ózara Dúisenbek dep atap ketipti. Shaqalaqty jáshikten tapqan turǵyn da aýrýhanaǵa arnaiy kelip, jaǵdaiyn bildi, dep habarlaidy KTK.
Názira Omarova eki kún buryn bolǵan sumdyq jaittan endi ǵana esin jiǵan. Aitýynsha, sol kúni ol syrtqa dári-dármek alýǵa shyǵypty. Biraq úi mańyndaǵy dárihanalardyń bári jabylyp, áiel basqa aýdanǵa qarai bet alǵan. Osylaisha aýlalardyń birimen kele jatyp balanyń yńyrsyǵan daýysyn estidi. Buǵan asa mán bermegenimen, álgi shyryl basylmapty. Sóitse, bul osy mańdaǵy qoqys jáshiginiń ishinde jatqan shaqalaq eken. Óz kózine ózi senbegen áiel sábidi birden qushaǵyma aldym deidi.
"Júregime basyp jylama, jylama, bári jaqsy bolady, sen qolymdasyń dep qyzymnyń úiine apardym. Onda aparǵan soń politsiiany shaqyrdyq. Dárigerler keldi. Álgi bala qolymda ózi kishkene daýysyn shyǵarmai, baýyryma basylyp jata qaldy. Ózimniń júregim sondai aýyryp qaldy. Túnimen uiyqtamadym", — deidi Pavlodar qalasynyń turǵyny Názira Omarova.
Eki tún durys uiyqtamaǵan áiel ózi qutqarǵan tastandynyń jaǵdaiyn bilý úshin aýrýhanaǵa attandy. Dalada jatqanda alǵash qushaǵyna alǵan adamnyń kelgenin sezdi me, bala da mazasyzdanyp jylap ketti. Beikúná sábidi qaita qolyna alǵan Nazira ony jubatyp, ózi de kóz jasyna erik berdi.
Al politseiler balasyn qoqys jáshigine tastap qashqan kókek anany izdestirýdi jalǵastyrýda. Boljamǵa qaraǵanda, ol sábidi osydan eki apta buryn dúniege ákelgen. Salmaǵy úsh keliden asatyn shaqalaq bolsa sýyq jerde bir saǵattai jatyp qalǵan. Sondyqtan da áli de dáriger baqylaýynda bolý kerek.
"Qazir balanyń jaǵdaiy jaqsy, jaman emes. Bala bizde jatqanda smespen tamaqtandyramyz. Jaǵdaiy bir qalypty, ziiany joq. Múmkin bári jaqsy bolsa, shyǵaramyz", — deidi neonatolog-dáriger Sholpan Qurmanova.
Sábimen jylap qoshtasqan 53 jastaǵy Názira Omarovanyń ózi – eki balanyń anasy. Tastandy sábidiń týǵan anasynyń jaqyn kúnderi tabylaryna ol senedi. Tabylmaǵan jaǵdaida durys jerde tárbielenýine septigimdi tigizemin dep otyr.
Emhanaǵa shaqalaqtyń jaǵdaiyn surap kelgen turǵyndardyń biri oǵan kiim-keshek berip ketipti. Buǵan qosa, sábidi asyrap alýǵa álden niet bildirip jatqandar da bar eken.
