Pavlodarda bir top qyz kámelettik jasqa tolmaǵan tanysyn uryp ketken. Búgin Pavlodar qalasynyń mamandandyrylǵan ákimshilik sotynda tóbeleske qatysy bar 7 boijetkenge qatysty úkim shyqty, dep habarlaidy "Ult aqparat".
28 aqpan kúni saǵat 19:00-de pablikterdiń birinde Pavlodarda kámelettik jasqa tolmaǵan qyzdy bir top áiel qatigezdikpen uryp ketkeni týraly video jariialanǵan bolatyn. Ol jerde tóbeleske qatysýshylar politsiia ustap alǵannan keiin de Instagram paraqshasyna ne istegenderi týraly video salǵandary jazylǵan. Videodan olardyń tirek pýnktinde syra iship turǵandaryn kórýge bolady. Atalǵan fakt Pavlodar politsiiasynyń soltústik bóliminde tirkelgen.
«28 sáýir kúni buryn tanys bolǵan qyzdar arasynda kelispeýshilik bolǵan. Tóbelestiń sebebi – zardap shekken qyz tanys qyzǵa sporttyq kiimin qaitarmai qoiǵan. Sondai-aq, tirek pýnktinde alkogoldi ishimdik ishkeni úshin bes qyzǵa qatysty ákimshilik jaza qoldanylady. Olardyń bári 5 ailyq eseptik kórsetkish kóleminde aiyppul tóleidi», - delingen baspasóz habarlamasynda.
Sondai-aq, 3 mamyr kúni Pavlodar qalasyndaǵy mamandandyrylǵan ákimshilik sotta tóbeleske qatysqan 7 qyzǵa qatysty QR Ákimshilik quqyq buzýshylyq kodeksiniń 434 (usaq buzaqylyq) jáne 476-baptary (tótenshe jaǵdai rejimin buzý) boiynsha sot boldy. Sonymen qatar, tóbeleske qatysqan bir qyz osy eki baptan bólek QR Ákimshilik quqyq buzýshylyq kodeksiniń 478-baby (tótenshe jaǵdai rejimi tártibin buzýǵa itermeleý áreketi) boiynsha is qozǵaldy.
Pavlodar oblystyq Politsiia departamentiniń habarlaýynsha, tóbeleske qatysqandardyń bári 5, 10, 15 táýlikke qamaýǵa alyndy.
«Tóbeleske qatysqandardyń ekeýinde kámelettik jasqa tolmaǵan balalary bar, sol sebepti olardyń jazasy jeńildetilip, birine 15 AEK, ekinshisine 10 AEK kóleminde aiyppul jazyldy. Olar ákimshilik jazadan bólek, ishki ister organdaryna «buzaqy tóbeleskish» retinde esepke alyndy», - deidi baspasóz qyzmeti.
Sonymen qatar, tóbeleske qatysýshylardyń bárine qatysty QR QK-niń 389-baby, 3-bólimi (ozbyrlyq) boiynsha sotqa deiingi tergeý isi bastaldy.
«Barlyq qyz laiyqty jazasyn alady. Tergeýshiler qajetti tergeý amaldaryn júrgizip jatyr. Qajetti materialdar jinaldy. Olardyń qanshalyqty deńgeide kináli ekenderin sot sheshedi», - deidi oblystyq Politsiia departamentiniń baspasóz qyzmeti.
