Pavlodar oblysynyń politseileri qatty aiazda jol qozǵalysyna qatysýshylarǵa kómek kórsetýdi jalǵastyrýda, "Ult aqparat".
«Tórtinshi qańtar kúni men otbasymmen birge Pavlodar qalasynan Aqtoǵai aýdanyna jolǵa shyqtym. Alaida qatty aiazdyń saldarynan kóligimiz synyp qaldy; múldem júrmei qaldy, al dalada – 40° aiaz. Biraz ýaqyttan keiin tońa bastadyq, tasjolda birde-bir kólik bolmady, eshkim de ótpedi; men otbasym alańdai bastadym, ábúiir bolǵanda politsiia qyzmetkerleri der kezinde keldi, – dep jazdy Pavlodar oblysy Aqtoǵai aýdanynyń turǵyny Andrei Sýprýn politsiia qyzmetkerlerine alǵys hatynda. – Bul quramynda Erbolat Jelkaidarov pen Nursultan Ahmetjanov bar Pavlodar oblysynyń patrýldik politsiiasy rotasynyń 0061 nómirli ekipajy boldy. Balalar toqtap, ystyq shai berdi, mashinamyzdy Aqtoǵai aýdanyna deiin súirep apardy».
Onyń aitýynsha, politsiia olardy úige deiin jetkizgen. Ol tártip saqshylarynyń ótip ketpei kómekteskeni úshin, otbasyn sýyqta qaldyrmaǵany úshin alǵysyn jetkizdi.
Sondai-aq quqyq qorǵaý organdarynyń qyzmetkerlerine jumysta sáttilik tiledi.
Politseiler óz kezeginde jolda qalǵan júrgizýshiler men olardyń jolaýshylaryna kómek kórsetý olardyń mindeti ekenin atap ótti.
«Pavlodar oblysynyń politsiia departamenti alys jolǵa shyqpaýǵa jáne aýa raiy men tasjoldyń jai-kúii týraly habarlamalarǵa qulaq asýǵa keńes beredi. Jolda qiyn jaǵdaiǵa tap bolǵan jol qozǵalysynyń barlyq qatysýshylary táýlik boiy 102 nómiri boiynsha ishki ister organdarynyń bólimshelerinen kómek surai alady» dep tolyqtyrdy óńirlik politsiia departamenti.
