Pavlodar oblysynyń Aqqýly aýdanynda 19 jastaǵy muǵalimdi zorlaǵan aýyl turǵynyna sot úkimi shyqty, dep habarlaidy "Ult aqparat" pavlodarnews.kz saityna silteme jasap.
Is Pavlodar oblysynyń qylmystyq ister jónindegi mamandandyrylǵan aýdanaralyq sotynda qaraldy. Prokýror kinálini 15 jylǵa bas bostandyǵynan aiyrýdy surady. Sottalýshy óz kinásin jartylai moiyndady.
Aiyptalýshy jáne onyń advokaty eń jeńil jaza taǵaiyndaýdy surady. Alaida, zardap shekken qyzdyń jáne kýágerlerdiń aiǵaqtarymen, saraptama qorytyndysymen qylmys tolyǵymen dáleldengen.
Aqqýly aýdanynyń 30 jastaǵy turǵynyna jábirlenýshiniń densaýlyǵyna aýyr ziian keltirgen zorlaý faktisi (QR QK 120-baby, 3-bóligi, 2-tarmaǵy) jáne óltiremin dep qorqytýmen ushtasqan, jynystyq sipattaǵy zorlyq-zombylyq jasaý faktisi boiynsha (QR QK 121-baby, 2-bóligi, 2-tarmaǵy) aiyptaý úkimi shyǵaryldy.
«Sottyń úkimimen oǵan 15 jylǵa bas bostandyǵynan aiyrý jazasy taǵaiyndaldy. Bul – zańmen belgilengen eń aýyr jaza. Jazany óteý qaýipsizdigi barynsha joǵary mekemede belgilendi», - dedi sýdia Nurlan Aitbaev.
Sonymen qatar, aýyl turǵyny kámeletke tolmaǵan balalarmen jumys isteýge bailanysty jáne pedagogikalyq laýazymdyq qyzmetterdi atqarý quqyǵynan ómir boiyna aiyryldy.
Budan bólek, muǵalimniń paidasyna moraldyq ziian retinde 2 million teńge kóleminde ótemaqy óndirildi.
Úkim zańdy kúshine engen joq.
Eske salaiyq, 19 jastaǵy aýyl muǵalimin zorlaý oqiǵasy týraly biylǵy aqpan aiynda habarlanǵan bolatyn. Kóp uzamai, kúdikti qolǵa tústi. Ol buǵan deiin urlyq jasaǵany úshin jaýapqa tartylǵan. 2017 jáne 2018 jyldary Pavlodar oblysynyń tergeýshileri qylmystyq isterdi sotqa joldaǵan. Alaida, sot barlyq isterdi taraptardyń bitimge kelýine bailanysty toqtatqan.
Boijetken men er adam bir-birin tanymaǵan. Izdeý sharalary barysynda kúdikti kórshi aýylda jasyrynǵan.
