Foto: pavon.kz
Joba Arnaýly memlekettik qor esebinen qarjylandyrylady. Úkimet bul maqsatqa 9,3 mlrd teńge bóldi, dep habarlaidy QR Premer-ministriniń baspasóz qyzmeti.
Memleket basshysynyń tapsyrmasyn oryndaý jáne elimizdiń kólik-logistikalyq áleýetin damytý tujyrymdamasyn júzege asyrý sheńberinde Pavlodar oblysynda áýejaidy jańǵyrtýǵa kirisip jatyr.
Joba jasandy ushý-qoný jolaǵyn, burý-qozǵalý jolyn, perrondy rekonstrýktsiialaý jumystaryn qamtidy.
— Jobany júzege asyrý ushý salmaǵy boiynsha shekteýsiz áýe kemeleriniń zamanaýi túrlerin qabyldaýǵa múmkindik beredi. Pavlodardyń geografiialyq ornalasýyn eskersek, bul óńirdiń tranzittik áleýetin arttyrady. Infraqurylymdy jańartý sonymen birge, oblystyń kólik qoljetimdiligin jaqsartýǵa, jolaýshylar aǵynyn arttyrýǵa jáne iskerlik belsendilikti damytýǵa yqpal etedi dep kútiledi. Jobanyń negizgi maqsaty — áýejai parametrlerin halyqaralyq ICAO standarttarynyń talaptaryna sáikestendirý, — delingen habarlamada.
Josparly jumystyń negizgi túrlerine mynalar jatady:
Ushý-qoný jolaǵyn 45 metrden 60 metrge deiin rekonstrýktsiialaý jáne keńeitý;
Burý-qozǵalý joly men perrondy jańartý;
Energiiamen jabdyqtaý júiesin jańǵyrtý;
Perimetri boiynsha jaryqpen signal berý jabdyqtary men beinebaqylaý júiesin ornatý.
Jóndeý jumystaryn júrgizý jáne ushý qaýipsizdigin qamtamasyz etý qajettiligine bailanysty áýejai qyzmeti ótken jyldyń sáýir aiynan beri ýaqytsha toqtatylǵan.
Osy ýaqytqa deiin áýe ailaǵy Astana jáne Almaty baǵyttary boiynsha turaqty reisterge qyzmet kórsetti.
Budan buryn Almatyda áýe reisteri aýa raiynyń qolaisyzdyǵyna bailanysty keshigip jatqanyn aitty.
