Eldegi barlyq urlyq túriniń ishinde páter urlyǵynyń úlesi 22,5 paiyzdy quraidy. Bul týraly IIM Qylmystyq politsiia departamentiniń basqarma bastyǵy Nurjan Rahmetýllaev aitty, dep habarlaidy "Ult aqparat".
«Páter urlyǵynyń zalaly shamaly bolǵan kúnde de týra osy qylmys múlik ielerine aitarlyqtai materialdyq jáne moraldyq ziian keltiredi. Azamattardyń qaýipsizdigi men ómir súrý jailylyǵynyń jalpy deńgeiine jaǵymsyz áser etedi», - dedi ol vedomstvoda ótken baspasóz máslihatynda.
Osyǵan bailanysty quqyq qorǵaý organdaryna qylmystyń osy túriniń aldyn alý boiynsha erekshe mindetter júktelip otyr.
«Kriminogendik jaǵdaiǵa jasalǵan taldaý kórsetkendei, sońǵy 4 jylda respýblika boiynsha páter urlyǵynyń úshten birge tómendegeni baiqalady. Osylaisha, sońǵy 11 aiynyń qorytyndysy boiynsha 30 myńǵa jýyq páter urlyǵy tirkelgen. Bul byltyrǵy jyldyń osyndai kezeńimen salystyrǵanda 7,5 paiyzǵa tómen. Mundaǵy qylmystyń jartysy ashylmai qalǵan. 6733 qylmysker ustaldy», - deidi ol.
IIM ókiliniń aitýynsha, jalpy sany 150 adamnan turatyn 43 qylmystyq top ustalǵan.
«Osylaisha, Almaty qalasynda jyldyń basynan beri Almaty, Shyǵys-Qazaqstan jáne Pavlodar oblystarynyń turǵyndarynan turatyn 7 qylmystyq top quryqtaldy. Olar 31 páter urlyǵyn jasaýmen áshkerelengen. Nur-Sultan, Almaty, Shymkent, Aqmola, Aqtóbe, Batys-Qazaqstan, Qaraǵandy Shyǵys-Qazaqstan oblystarynan «ury-gastrolerlerden» turatyn jáne jalpy alǵanda 50 páter urlyǵyn jasaǵan 9 qylmystyq toptyń qylmystyq áreketi áshkerelendi», - deidi ol.
Mysaly, Nur-Sultan qalasynda quramyna boijetken qyz da kirgen 4 adamnan turatyn top ustalǵan. Olar biryńǵai shet jatqan aýdandarda áreket etken. Mańdaishasy bar úilerdi tańdap, ashyq turǵan jelkózder arqyly nemese plastik terezelerdi yǵystyrýmen páterge engen. Osy oraida qyz ben jigit ǵashyq juptyń rólin oinap, saqtyq sharasy úshin kireberiste turǵan. Olardyń 12 páter urlyǵyn jasaǵany dáleldengen.
