23 sáýirde keshkisin Erevannyń Respýblika alańynda narazylyq aktsiiasynyń lideri bolǵan, oppozitsiialyq depýtat Nikol Pashinian jańa premer-ministr bir aptanyń ishinde sailanýy kerektigin málimdedi, dep habarlaidy Baq.kz aqparat agenttigi.
Nikol Pashinian Armeniiadaǵy biliktiń beibit jaǵdaida aýysyna qatysty talaptardy qaitalady. Ol birinshi kezekte Serj Sargsiandy premer-ministr qyzmetinen ketirý talaby oryndaldy dedi. Endi bir apta ishinde Ulttyq májilis jańa premer-ministrdi sailaýy kerek.
Pashinian merziminen buryn parlament sailaýy barynsha qysqa merzimde qaita ótýi tiis dedi. Sonymen birge 25 sáýirde «Marriott Armeniia» qonaq úiinde ýaqytsha premer-ministr qyzmetin atqarýshy Karen Karapetianmen kelissóz júretinin de habarlady.
Serj Sargsian 11 kúnge sozylǵan halyq tolqýynan keiin premer-ministr qyzmetinen ketti. Ol 2008-2018 jyldarǵa deiin Armeniia prezidenti bolǵan. Osy ýaqytta ol Konstitýtsiiaǵa ózgerister engizip, premer-ministr ókilettigin keńeitken. 17 sáýirde prezidenttik ókilettigi aiaqtalǵannan keiin, narazylyqqa qaramastan úkimet tizginin qolyna alǵan.
