7 sáýir kúngi Máskeýge saparynda Armeniia premer-ministri Nikol Pashinian Resei basshysy Vladimir Pýtinnen Taýly Qarabaqtaǵy soǵys kezinde tutqyndalǵan armian sarbazdaryn bosatýǵa qol ushyn berýdi surady.
Byltyr kúzde Armeniia men Ázerbaijan arasynda Taýly Qarabaq úshin soǵys bolǵan. Bul aýmaq halyqaralyq dárejede Ázerbaijan bóligi retinde moiyndalǵanmen, 1990 jyldyń basynan beri etnikalyq armiandar baqylaýynda bolǵan.
Alty aptaǵa sozylǵan soǵys Resei aralasýymen jasalǵan atysty toqtatý týraly kelisimmen aiaqtalǵan. Oǵan sáikes, Taýly Qarabaqtyń bir bóligi jáne oǵan japsarlas jatqan jeti aýdan Ázerbaijan baqylaýyna ótti.
Osy kelisimniń júzege asýyn qadaǵalaý úshin Taýly Qarabaq jerine Reseidiń 2 myń adamnan turatyn bitimger áskeri kirdi. 6 myńnan adam soǵysta qaza tapqan. Biraq Taýly Qarabaqtyń aqyrǵy mártebesi bulyńǵyr kúide qaldy.
Ázerbaijan tarabynyń qansha armian soldatyn tutqynda ustap otyrǵany jaily resmi málimet joq. Degenmen RBK aqparat agenttiginiń jazýynsha, Ázerbaijanda shamamen 140 armian sarbazy qamaýda otyr. Armeniia jaǵynda da qansha ázerbaijandyq bary belgisiz.
