Memleket basshysy ál-Farabi atyndaǵy Oqýshylar saraiynda ornalasqan sailaý ýchaskesine baryp, Qazaqstan Respýblikasy Májilisi men jergilikti máslihattar sailaýynda óz tańdaýyn jasady.
Prezident qazaqstandyq jáne sheteldik buqaralyq aqparat quraldary úshin uiymdastyrylǵan brifingte Parlament sailaýy árbir eldiń ómirindegi asa mańyzdy oqiǵa ekenin atap ótti.
– Bul sailaý memleketimizdiń odan ári damýyna serpin beredi. Jalpy bizdiń Parlamentke neǵurlym kóp partiia kirse, elimizdiń bolashaǵy úshin de soǵurlym jaqsy bolady. Sondyqtan sailaý ádil ótedi dep senemin. Parlamenttiń negizgi mindeti sapaly zańdar qabyldaý. Qazaqstanǵa sapaly zańnama júiesi qajet. Sol sebepti bárimiz osy múmkindikti paidalanyp daýys berýimiz kerek, – dedi Qasym-Jomart Toqaev.
Jýrnalister eń aldymen Prezidenttiń sailaýǵa qandai kóńil-kúimen kelgenin, qai partiiaǵa daýys bergenin surady.
– Kóńil-kúiim óte jaqsy. Halqymyz belsendi túrde daýys berip jatyr. Biz Qazaqstannyń bolashaǵy, elimizdiń damýy úshin daýys berdik. Parlamentte elimizdiń keleshegi, halqymyzdyń taǵdyry jaiynda keń aýqymdy pikirtalastar bolýy kerek, – dedi Prezident.
BAQ ókilderin Qasym-Jomart Toqaevtyń sailaýdan ne kútetini, qandai úmit artatyny qyzyqtyrdy.
– Bul sailaý elimizdegi demokratiiany damytýǵa jasalǵan taǵy bir qadam bolýy kerek. Ár sailaý – azamattyq qoǵamnyń ilgerilegenin kórsetetin synaq. Bizdiń Parlamentimizde ártúrli partiialar bolatynyna úlken úmit artamyn, – dedi Memleket basshysy.
Jýrnalister Prezidentten sailaýaldy úgit-nasihat naýqanynyń qanshalyqty básekege sai ótkeni týraly surady.
– Halqymyzdyń azamattyq belsendiligi óte joǵary. Úmitkerler óte kóp. Barlyǵyna teń múmkindik jasaldy. Jalpy alǵanda, sailaý joǵary deńgeide, zańnamaǵa sáikes ótip jatyr. Qandaida da bir zań buzýshylyqtar tirkelgen joq. Biz bárin muqiiat baqylap otyrmyz. Bul sailaý bárimizge, ásirese, azamattyq qoǵamǵa úlken synaq. Sondyqtan sailaý jaqsy ótedi dep oilaimyn, – dedi Qasym-Jomart Toqaev.
Brifing barysynda Memleket basshysy reformalardyń kezekti paketi ázirlenip jatqanyn aitty.
– Reformalar daiyndalyp jatyr. Ol toqtamaýy kerek. 15 qańtarda Parlamentte depýtattardyń jańa quramynyń aldynda sóileimin. Odan keiin Ulttyq qoǵamdyq senim keńesiniń otyrysynda aldaǵy reformalar jaiy jan-jaqty talqylanady, – dedi Prezident.
Jýrnalister Qasym-Jomart Toqaevtan bolashaqta Úkimette bolatyn aýys-túiister týraly pikirin surady.
– Bizdiń zańnamaǵa sáikes, Úkimet otstavkaǵa ketýi kerek. Sailaýdan soń Parlamentte jańadan sailanǵan depýtattarmen jáne fraktsiia jetekshilerimen Premer-Ministrdiń, Úkimet músheleriniń quramy jóninde aqyldasamyn, – dedi Memleket basshysy.
