Kóppartiialy Parlament – qazirgi zamannyń talaby. Bul týraly «Aýyl» Halyqtyq-demokratiialyq patriottyq partiiasynyń Parlament jáne máslihattarǵa kezekti sailaýdyń jariialanýyna qatysty málimdemesinde aitylǵan, dep habarlaidy "Ult aqparat".
«Búgin Qasym-Jomart Kemeluly Toqaev Qazaqstan Respýblikasy Parlamenti Májilisi men máslihattary depýtattarynyń kezekti sailaýy ótetini jaily jarlyǵyn jariialady. «Aýyl» partiiasy Prezidenttiń bul sheshimin quptaidy.
Bul qazirgi kezeńdegi koronavirýs pandemiiasyna qaramastan elimizdiń barlyq azamattaryna Konstitýtsiiada kórsetilgen sailaý quqyǵyn paidalanýǵa múmkindik beretin durys sheshim. Sailaý – kez kelgen memlekettiń demokratiialyq damýynyń ajyramas bóligi», - delingen «Aýyl» partiiasynyń Saiasi keńes prezidiýmy taratqan málimdemede.
Atap ótilgendei, konstitýtsiialyq merzimde ótkiziletin bul sailaý áielder men jastarǵa 30 paiyzdyq kvotanyń qarastyrylýy, parlamenttik oppozitsiia institýtynyń engizilýi, sondai-aq máslihat depýtattarynyń partiialyq tizimmen sailanýy siiaqty belgili bir jańashyldyqtarymen erekshelenbek.
«Biz, el turǵyndarynyń aýqymdy bóliginiń múddesin arqalaǵan partiia retinde, atalmysh ózgerister halqymyzdyń saiasi partiialar institýtyna degen senimin arttyra túsedi dep esepteimiz.
Sondai-aq, osy jolǵy sailaý kóppartiialyq parlamenttiń qalyptasýyna sebepker bolyp, qoǵamnyń jańarýǵa degen suranysyn qanaǵattandyrady dep oilaimyz.
Kóppartiialy Parlament – qazirgi zamannyń talaby, Qazaqstandaǵy saiasi jańǵyrýdyń jańa kezeńi.
Saiasi partiialar arasyndaǵy ádil básekelestik pen sailaý úderisi men daýystardy sanaýdaǵy ashyqtyq qana Qazaqstannyń odan ári damýynyń kepili bola alady dep esepteimiz», - dedi partiiadan.
