QR Kásipodaqtar federatsiiasy tóraǵasynyń orynbasary, Ulttyq qoǵamdyq senim keńesiniń múshesi Erlan Sairov aldaǵy Parlament Májilisiniń sailaýy halqymyzdyń yntymaǵy men birligin arttyra otyryp, elimizde saiasi pliýralizmdi damytýǵa alǵyshart bolaryna senetinin aitty. Eske salaiyq, Memleket basshysy búgin Májilis pen máslihat depýtattarynyń kezekti sailaýyn 2021 jylǵy 10 qańtarǵa taǵaiyndaý týraly Jarlyqqa qol qoiǵan bolatyn, dep habarlaidy QazAqparat.
«Basty aita ketetin másele – 2004 jyldan bastap Parlament sailaýy konstitýtsiialyq merzimde taǵaiyndalyp otyr. Bul aspekt elimizdegi qoǵamdyq saiasi protsesterdiń boljamdylyq deńgeiin arttyrary sózsiz. Sonymen birge Ulttyq keńes aiasyndaǵy el Prezident Qasym-Jomart Kemeluly Toqaevtyń usynǵan saiasi reformalarynyń birinshi paketi óziniń jemisin bereri anyq», - dedi QazAqparat tilshisine telefon arqyly bildirgen pikirinde sarapshy.
Erlan Sairovtyń aitýynsha bul is-sharalardyń arasynda barlyq deńgeidegi máslihattardyń qatary 30 paiyzdyq kvota aiasynda jastar men áieldermen tolyqtyrylatyny belgili.
«Nur Otan partiiasynyń praimeriziniń qorytyndylaryna súiensek jastar men áielderdiń sany máslihattarda 50 paiyzdan asyp ketetindei kórinip tur. Osy aspekt aýdan, oblystyq deńgeide jastardyń sanynyń kóbeiip, aimaqtyq dárejedegi qoǵamdyq-saiasi protsester paida bolatyny anyq. Bizde saiasi reformalar tek Nur-Sultan men Almaty qalasynda júrýi tiis degen jańsaq pikir bar. Al negizinde saiasi reformalar aimaqta júrýi tiis. Ol úshin jergilikti máslihattar jańaryp turýy kerek. Sol organdarǵa printsipti pozitsiiasy bar, ákimderge óziniń oiyn ashyq aita alatyn, qoǵamdyq kúsh-jigeri mol azamattar kelýi kerek. Sol kezde elimizde evoliýtsiialyq damýǵa sáikes, jańa kúshter kelip, elimizdiń aimaqtarynda áleýmettik transformatsiia júredi», - dedi ol.
Sarapshy osy protsesterge qazir alǵyshart jasalyp otyrǵanyn jetkizdi.
«Májilistiń ózinde parlamenttik oppozitsiianyń jumysyn damytý úshin kóptegen másele qarastyrylǵan. Osy atalǵan aspektiler elimizdiń saiasi protsesterin evoliýtsiialyq túrde birte-birte ózgertýge irgetas jasaidy. Biz turaqsyz álemde týrbýlentti zamanda elimizde turaqtylyqty saqtap otyrǵan elmiz. Demokratiialyq protsester kerek. Degenmen ol protsester elimizdiń tutastyǵy men yntymaqtastyǵyna zalalyn tigizbeýi tiis. Sondyqtan bul sailaý halqymyzdyń yntymaǵy men birligin arttyra otyryp, elimizde saiasi pliýralizmdi damytýǵa alǵyshart bolaryna senemiz», - dedi ol.
Eske sala ketsek búgin Memleket basshysy Qasym-Jomart Toqaev QR Parlamenti Májilisi jáne máslihat depýtattary sailaýyn taǵaiyndaý týraly úndeý jariialaǵan bolatyn.
«Búgin men Parlament Májilisi depýtattarynyń sailaýyn taǵaiyndaý týraly Jarlyqqa qol qoidym. Ortalyq sailaý komissiiasynyń qaýlysymen barlyq deńgeidegi máslihat depýtattarynyń sailaýy taǵaiyndalady. Aldaǵy sailaý konstitýtsiialyq merzimge sáikes, 2021 jyldyń 10 qańtarynda ótedi. Barlyq saiasi partiialardyń bul sailaý naýqanyna qatysýǵa daiyndalýyna, sailaý aldyndaǵy platformasyn ázirleýine, partiialyq infraqurylymdardy jetildirýine ýaqyty jetkilikti boldy», - dedi Prezident úndeýinde.
