Búgin QR Parlamenti Májilisiniń jalpy otyrysynda palata depýtattary «Halyq densaýlyǵy jáne densaýlyq saqtaý júiesi týraly» Kodeks jobasyna Senat engizgen tolyqtyrýlardy talqylap, ol boiynsha kelisimin berdi, dep habarlaidy QazAqparat.
«Memleket basshysy Qasym-Jomart Toqaevtyń Ulttyq qoǵamdyq senim keńesiniń otyrysynda bergen tapsyrmasyna sáikes, Parlament Senatynyń depýtattary «Halyq densaýlyǵy jáne densaýlyq saqtaý júiesi týraly» Kodeks jobasyna ózgerister men tolyqtyrýlar engizdi. Bul ózgerister men tolyqtyrýlar Májilis maquldaǵan Kodeks jobasynyń tujyrymdamalyq mánin ózgertpeidi», - dedi Májilis depýtaty Záýresh Amanjolova.
Sonymen qatar, Májilistiń jalpy otyrysynda palata depýtattary ilespe zań jobasyna Senat engizgen tolyqtyrýlarmen kelisti.
«Memleket basshysy Ulttyq qoǵamdyq senim keńesiniń otyrysynda meditsina qyzmetkerleriniń qylmystyq jaýaptylyǵynyń oryndylyǵyna syni turǵydan taldaý jasaýdy tapsyrdy. Osyǵan orai Parlament Senatynyń depýtattary «Qazaqstan Respýblikasynyń keibir zańnamalyq aktilerine densaýlyq saqtaý máseleleri boiynsha ózgerister men tolyqtyrýlar engizý týraly» zań jobasyna ózgerister men tolyqtyrýlar engizdi. Quqyq buzýshylardyń keibir sanattary Qylmystyq kodeksten Ákimshilik quqyq buzýshylyq kodeksine kóshirildi. Bul ózgerister men tolyqtyrýlar Májilis maquldaǵan zań jobasynyń tujyrymdamalyq mánin ózgertpeidi», - dedi Z. Amanjolova.
Eske sala keteiik, biyl 11 maýsymda QR Parlamenti Senatynyń jalpy otyrysynda «Halyq densaýlyǵy jáne densaýlyq saqtaý júiesi týraly» kodeks jobasy men ilespe zań jobasy qaraldy. Talqylaý barysynda senatorlar tarapynan usynylǵan ózgerister men tolyqtyrýlar eskerile otyryp, qujat Májiliske qaitaryldy.Parlament qabyldaǵan Kodeks jeke jáne álemdik tájiribeniń úzdik mysaldaryna negizdelgen densaýlyq saqtaýdyń jańa, uzaq merzimdi modelin qurýǵa, sondai-aq meditsinalyq qyzmetterdiń qoljetimdiligi men sapasyn qamtamasyz etý maqsatyn kózdeidi. Kodeksti ázirleý barysynda Dúniejúzilik densaýlyq saqtaý uiymynyń usynymdary, Ekonomikalyq yntymaqtastyq jáne damý uiymyna múshe memleketterdiń damý kórsetkishteri jáne Qazaqstan Respýblikasynyń 2050 jylǵa deiingi strategiiasy eskerilgen.
Qoǵamdyq densaýlyq saqtaýǵa toqtalyp ótsek, elimizdiń densaýlyq saqtaý salasyndaǵy maqsattaryna jetý – memlekettiń, zańdy tulǵalar men azamattardyń ortaq jaýapkershiligi bolǵan jaǵdaida ǵana múmkin.
Osyǵan orai, Kodeks jobasyna buryn zańnamada kózdelmegen jańa baptar engizildi. Mysaly, salaaralyq árekettestik máselelerin sheshý maqsatynda qoǵamdyq densaýlyq salasyndaǵy memlekettik saiasatty iske asyrý bóliginde memlekettik organdardyń mindetteri aiqyndaldy.
Jumyskerler arasynda densaýlyq saqtaý men profilaktika baǵdarlamasyn ázirlep, iske asyrý, salaýatty jumys oryndaryn qurý jáne jumyskerlerdiń skriningterden ótý mindettemesi – zańnamalyq túrde kózdelgen.
